एसटीला ३०० कोटींची 'दिवाळी', पण हंगामी भाडेवाढीवर लवकरच निर्णय

 लेवाजगत न्युज:-दिवाळीतील एसटी वाहतूक निर्विघ्नपणे पार पडावी आणि आर्थिक अडचणीत असलेल्या एसटी महामंडळाला आर्थिक हातभार लागावा यासाठी ३०० कोटी रुपयांचे अर्थसाह्य करण्याचा निर्णय राज्य सरकारने घेतला आहे. हा निधी रोखीने देण्यासाठी सरकारने नुकताच शासन निर्णय काढला केला. यामुळे डिझेल पुरवठादारांची देणी काही प्रमाणात फेडता येणार आहेत.

एसटीतील अधिकारी-कर्मचारीवर्गाला सप्टेंबरचे वेतन देण्यासाठी एसटी महामंडळाने ७३८.५० कोटी रुपये निधीची मागणी केली होती. याबाबतचा विनंतीप्रस्ताव महामंडळाकडून वित्त विभागाला पाठवण्यात आला. याला मान्यता देऊन राज्य सरकारने ३०० कोटी रोखीने देण्यास मंजुरी दिली. २०२२-२३ अर्थसंकल्पानुसार महामंडळासाठी एकूण दोन हजार ४५० कोटी रुपयांची तरतूद करण्यात आली आहे.

या निधीमुळे महामंडळाला दिवाळीनिमित्त विशेष वाहतूक करण्यास मदत मिळणार आहे. सध्या सप्टेंबरच्या वेतनाचा प्रश्न मार्गी लागला आहे. ऑक्टोबरमध्ये दिवाळी विशेष वाहतूक सुरू होणार आहे. यातून एसटीच्या महसुलात चांगली वाढ होईल. दरम्यान, महामंडळाची सुट्टे भाग, टायर, इंजिन ऑइल या सर्व साहित्यांची देणी थकली आहेत. यापैकी काही निधी संबंधित पुरवठादारांना देता येईल, असा विश्वास एसटी अधिकाऱ्यांनी व्यक्त केला. दरम्यान, एसटी कर्मचाऱ्यांच्या संपानंतर कर्मचारी-अधिकारीवर्गाच्या वेतनाची जबाबदारी राज्य सरकारने घेतली आहे. याबाबतचे प्रतिज्ञापत्र राज्य सरकारने न्यायालयात दिले आहे.

सणासुदीत एसटीच्या १४९४ जादा गाड्या

दिवाळी आणि जोडून येणाऱ्या सुट्ट्यांचा कालावधी पाहता कुटुंबीय आणि मित्रपरिवारासह पर्यटनासाठी जाणाऱ्या प्रवाशांच्या सोयीसाठी महाराष्ट्र राज्य मार्ग परिवहन महामंडळाने यंदा राज्यभरात एक हजार ४९४ 'दिवाळी विशेष' जादा गाड्या सोडण्याचा निर्णय घेतला आहे. २१ ते ३१ ऑक्टोबरदरम्यान या गाड्या धावणार आहेत.

दिवाळीत कॉलेज व शाळांना सुट्टी असते. त्यामुळे अनेक कुटुंबे मुलांसह गावी, धार्मिक स्थळे किंवा पर्यटनस्थळांना भेट देण्याचे नियोजन करतात. नोकरीनिमित्त बाहेर असणारे कर्मचारीही या सणात आपल्या घरी येत-जात असतात. यंदा दिवाळीला जोडून आलेल्या सुट्ट्या पाहता महामंडळाने दरवर्षीप्रमाणे नियमित बसफेऱ्यांसोबतच प्रवासी गर्दी लक्षात घेऊन जादा गाड्या उपलब्ध करून दिल्या आहेत. प्रवाशांची वाढती गर्दी पाहून टप्प्या-टप्प्याने गाड्यांची संख्या वाढविण्यात येणार आहे. मध्यवर्ती कार्यालयातील वाहतूक खात्यामार्फत २९ सप्टेंबरला सर्व विभागांना या जादा गाड्या आरक्षणासाठी उपलब्ध करून देण्यात आल्या असल्याचे महामंडळाचे उपाध्यक्ष व व्यवस्थापकीय संचालक शेखर चन्ने यांनी सांगितले.

एसटी महामंडळाने 'अमृत ज्येष्ठ नागरिक' योजनेतंर्गत ७५ वर्षांवरील नागरिकांना एसटीच्या सर्व सेवांमधून मोफत प्रवास लागू केला आहे. ६५ ते ७५ वर्षांदरम्यानच्या ज्येष्ठ नागरिकांना सर्व सेवांमधून ५० टक्के सवलत अनुज्ञेय करण्यात आली आहे. त्यामुळे दिवाळीच्या सणात ज्येष्ठ नागरिकांनी या योजनेचा लाभ घ्यावा, असे आवाहन चन्ने यांनी केले आहे.

अश्या असतील विशेष गाड्या

विभाग - बससंख्या

• मुंबई - २२८
• पुणे -३५८
• औरंगाबाद - ३६८
• नागपूर - १९५
•  नाशिक - २७४
• अमरावती -७१

एकूण - १,४९४

एसटी बसच्या आरक्षणासाठी

एसटी बसच्या आरक्षणासाठी प्रवाशांनी एसटी महामंडळाच्या www.msrtc.maharashtra.gov.in या संकेतस्थळासह msrtc mobile reservation Appचा वापर करावा.

भाडेवाढीवर लवकरच निर्णय

दिवाळीनिमित्त एसटीला प्रवासी मागणी वाढती असते. यामुळे महामंडळाकडून १० टक्के हंगामी भाडेवाढ करण्यात येते. यंदाही भाडेवाढीचा प्रस्ताव आहे. शिवाय एसटी अधिकारी-कर्मचाऱ्यांना दिवाळीनिमित्त अद्याप भेट जाहीर झालेली नाही. या दोन्ही प्रस्तांवावर लवकरच निर्णय अपेक्षित असल्याचे महामंडळाकडून स्पष्ट करण्यात आले.