POP मूर्तींना परवानगी, पण उंच मूर्तींचं विसर्जन अजून अडचणीत!

लेवाजगत न्युज मुंबई:-  प्लास्टर ऑफ पॅरिसवरील बंदी मुंबई उच्च न्यायालयाने उठवल्यानंतर या मूर्तींचे विसर्जन करण्यासाठीही आता परवानगी मिळेल, अशी आशा महामुंबई परिसरातील सार्वजनिक गणेशोत्सव मंडळांमध्ये निर्माण झाली आहे. या मूर्तींची तयारी एप्रिल-मेपासून सुरू होते. याची नोंदणी आधीच झाली असून, अनेक मंडळे मूर्तींची उंची पूर्वीप्रमाणेच १५ ते २० फूट ठेवण्याचा निर्णय घेत आहेत. राजकीयदृष्ट्या महापालिका निवडणुकीसाठी हा निर्णय महत्त्वाचा असल्याने या निर्णयामध्येही उपाय शोधला जाईल, अशी कुजबूज मंडळाच्या पदाधिकाऱ्यांमध्ये आहे.

मोठ्या मूर्तींच्या विसर्जनासाठी नैसर्गिक प्रवाहांचाच आधार घेतला जाईल किंवा जे होईल ते गणेशोत्सवात विसर्जनाच्या वेळी पाहिले जाईल, अशी भूमिका घेऊन अनेक मंडळांनी उंच मूर्तींसाठी तयारी सुरू केली आहे. विसर्जन व्यवस्थेसाठीचा निर्णय घेण्यासाठी ३० जूनपर्यंत राज्य सरकारला मुदत दिली असली तरी त्यानंतर मूर्तीच्या उंचीचा निर्णय घेऊन मग मूर्ती घडवणे शक्य नसल्याने अनेक मंडळांनी आधीच्या वर्षाप्रमाणेच नियोजन सुरू केले आहे. यंदा गणेशोत्सव लवकर असल्याने ३० जूननंतर मूर्तीच्या उंचीचा निर्णय घेतल्यास मंडळांच्या हातात फारसे दिवस तयारीसाठी उरणार नसल्याने यासंदर्भात विचार होत नसल्याची नाराजीही मंडळांनी व्यक्त केली आहे.

बृहन्मुंबई सार्वजनिक गणेशोत्सव समन्वय समितीचे पदाधिकारी मंडळांशी चर्चा करत असून, उंच मूर्तींचे विसर्जन नेमके कसे करणार, असा प्रश्न मंडळांना विचारला जात आहे. मात्र, महापालिका निवडणुकीमुळे लोकांमधील नाराजी टाळण्यासाठी मूर्तीच्या उंचीवर निर्बंध येणार नाही, असा विश्वास मंडळांकडून व्यक्त केला जात असल्याचे समजते. काही मंडळांनी यंदा उंच कागदी मूर्तीचाही निर्णय घेतला आहे.

मात्र, या मूर्तींचा बनवण्याचा खर्च दुप्पट होत असल्याने कागदी मूर्तींची प्रतिष्ठापना करणाऱ्या मंडळांची संख्या फारशी वाढणार नाही, अशीही एक शक्यता वर्तवली जात आहे. काही मंडळांनी मुंबईमध्ये सुरू असलेले पुलाचे काम आणि त्यामुळे मूर्तीच्या विसर्जन मार्गामध्ये येणाऱ्या अडथळ्यांचा विचार सुरू केला आहे. त्यावरही दुसरा उपाय मिळतो का याचीही चाचपणी सुरू आहे. मुंबईमध्ये अनेक तलाव विनावापर पडून आहेत. या तलावांमध्ये मूर्ती विसर्जन करण्यासाठी महापालिकेने पुढाकार घेऊन त्याची स्वच्छता करावी, असाही एक सूर या निमित्ताने व्यक्त होत आहे.