हॉकर्सनाही क्रेडिट कार्ड; पीएम स्वनिधीतून ३० हजारांपर्यंत कर्ज

 

Jemini AI nirmit emej

हॉकर्सनाही क्रेडिट कार्ड; पीएम स्वनिधीतून ३० हजारांपर्यंत कर्ज

जळगाव प्रतिनिधी :
पथविक्रेत्यांच्या (हॉकर्स) व्यवसायाला चालना देण्यासाठी केंद्र सरकारने पीएम स्वनिधी योजनेत महत्त्वपूर्ण बदल करत तिचा कालावधी आता मार्च २०३० पर्यंत वाढवला आहे. या योजनेअंतर्गत पथविक्रेत्यांना कर्जासोबतच क्रेडिट कार्डची सुविधाही उपलब्ध करून देण्यात येणार आहे.

योजनेत डिजिटल व्यवहारांना प्रोत्साहन देण्यासाठी विशेष सवलती देण्यात येत आहेत. नियमित डिजिटल व्यवहार करणाऱ्या लाभार्थ्यांना दरमहा ठराविक कॅशबॅक मिळणार असून वर्षभरात ही रक्कम वाढणार आहे. तसेच किमान व्यवहारांची अट पूर्ण केल्यास अतिरिक्त प्रोत्साहनही दिले जाणार आहे.

याअंतर्गत कर्जाची मर्यादा टप्प्याटप्प्याने वाढवण्यात आली आहे. पहिल्या टप्प्यात १० हजार रुपये, दुसऱ्या टप्प्यात २० हजार रुपये आणि तिसऱ्या टप्प्यात ३० हजार रुपयांपर्यंत कर्ज दिले जाणार आहे. कर्जाची परतफेड वेळेत केल्यास पुढील टप्प्यासाठी लाभार्थी पात्र ठरणार आहेत.

विशेष म्हणजे, कर्जावर व्याज अनुदानाची सुविधाही देण्यात येत आहे. वेळेत परतफेड करणाऱ्या लाभार्थ्यांना ठराविक टक्केवारीने व्याज परत दिले जाणार आहे. ही रक्कम थेट लाभार्थ्यांच्या बँक खात्यात जमा केली जाणार आहे.

जिल्हा प्रशासन आणि महानगरपालिकांच्या माध्यमातून योजनेची प्रभावी अंमलबजावणी करण्यात येत असून, पात्र पथविक्रेत्यांनी या योजनेचा लाभ घ्यावा, असे आवाहन प्रशासनाने केले आहे.