साधुग्रामसाठी २२६७ कोटींच्या निधीस मंजुरी; शेतकऱ्यांना थेट मोबदला देणार

 

साधुग्रामसाठी २२६७ कोटींच्या निधीस मंजुरी; शेतकऱ्यांना थेट मोबदला देणार

नाशिक, दि. १६ मे २०२६ : आगामी सिंहस्थ कुंभमेळ्यासाठी साधुग्राम उभारणीचा दीर्घकाळ प्रलंबित असलेला प्रश्न अखेर मार्गी लागला आहे. राज्य शासनाने साधुग्रामासाठी आवश्यक जमिनींपैकी उर्वरित ७५३ एकर जागा संपादित करण्यासाठी तब्बल २२६७ कोटी रुपयांच्या निधीस मंजुरी दिली आहे. विशेष म्हणजे, यावेळी शेतकऱ्यांना थेट मोबदला देण्याचा निर्णय घेण्यात आला असून, त्यामुळे अनेक वर्षांपासून सुरू असलेल्या वादावर पडदा पडण्याची शक्यता व्यक्त होत आहे.

उपमुख्यमंत्री एकनाथ शिंदे यांनी सोशल मीडियावर पोस्ट करत ही माहिती दिली. त्यांनी सांगितले की, शेतकरी आणि साधुग्रामाचा प्रश्न लक्षात घेऊन शासनाने महत्त्वपूर्ण निर्णय घेतला असून, यामुळे साधू-महंत, आखाडे आणि भाविकांना मोठा दिलासा मिळणार आहे.

१४५० एकरांवर उभारला जाणार साधुग्राम

सिंहस्थ कुंभमेळ्यासाठी तपोवन परिसरात एकूण १४५० एकर जागेवर साधुग्राम उभारण्याचा निर्णय घेण्यात आला आहे. त्यापैकी ७५३ एकर जागेचा प्रश्न कायमस्वरूपी निकाली निघाला असून, उर्वरित सुमारे ९०३ एकर जागा प्रशासनाकडून भाडेतत्त्वावर उपलब्ध करून दिली जाणार आहे.

साधुग्राममध्ये अत्याधुनिक सुविधा

साधुग्राममध्ये अंतर्गत रस्ते, मलनिस्सारण व्यवस्था, जलवाहिन्या, विद्युत सुविधा यांसह विविध पायाभूत सुविधा उभारल्या जाणार आहेत. तसेच भाविकांसाठी निवास व्यवस्था, शॉपिंग सेंटर, भोजनालये, दवाखाने, अग्निशमन केंद्र आणि सेक्टर कार्यालयांची उभारणीही करण्यात येणार आहे. परिसराचे सुशोभीकरणही केले जाणार आहे.

कुंभमेळ्यात भाविकांची वाढती संख्या

२०१५ च्या तुलनेत २०२७ मध्ये सिंहस्थ कुंभमेळ्यात येणाऱ्या भाविकांची संख्या मोठ्या प्रमाणात वाढण्याचा अंदाज प्रशासनाने व्यक्त केला आहे.

घटक	२०१५	२०२७ अंदाज
क्षेत्र	३२२ एकर	१००० एकर
साधू-महंत	२.२२ लाख	१० लाख
प्लॉट	१,२७३	५,४७०
शौचालये	१०,७६८	३६,०६४
स्नानघाट	१३,८८०	५४,०८०

प्रशासनाच्या या निर्णयामुळे शेतकऱ्यांना थेट आर्थिक लाभ मिळणार असून, कुंभमेळ्याच्या नियोजनालाही गती मिळणार असल्याचे सांगितले जात आहे.