भुसावळ येथे महिला आरोग्य शिबिराला उत्स्फूर्त प्रतिसाद जागतिक स्तनपान सप्ताहानिमित्त शेकडो महिलांनी घेतला लाभ
भुसावळ येथे महिला आरोग्य शिबिराला उत्स्फूर्त प्रतिसाद
जागतिक स्तनपान सप्ताहानिमित्त शेकडो महिलांनी घेतला लाभ
भुसावळ (प्रतिनिधी) : जागतिक स्तनपान सप्ताहानिमित्त आणि यांच्या संयुक्त विद्यमाने आयोजित विशेष महिला आरोग्य शिबिराला पहिल्याच दिवशी महिलांचा उत्स्फूर्त प्रतिसाद मिळाला. मोठ्या संख्येने महिलांनी आरोग्य तपासणी करून तज्ज्ञ डॉक्टरांचे मार्गदर्शन घेतले.
शिबिराचे उद्घाटन प्रभारी नगराध्यक्षा शैलजा नारखेडे, सामाजिक कार्यकर्त्या रजनी सावकारे, आरोग्य सभापती मेघा वाणी, वैद्यकीय अधिकारी संदीप जैन आणि तौसिफ खान यांच्या प्रमुख उपस्थितीत झाले. यावेळी प्रसूती व स्त्रीरोग विभागातील तज्ज्ञ डॉक्टर, वैद्यकीय अधिकारी तसेच आरोग्य कर्मचारी उपस्थित होते.
शिबिरात गर्भाशयाशी संबंधित आजार, गर्भाशय काढण्याच्या शस्त्रक्रियेची आवश्यकता, स्तनातील गाठींची तपासणी, गर्भवती महिलांसाठी आयर्न सुक्रोज इंजेक्शनचे महत्त्व, स्तनपानाचे फायदे तसेच महिलांच्या विविध आरोग्य समस्यांबाबत सविस्तर मार्गदर्शन करण्यात आले. अनेक महिलांची प्राथमिक तपासणी करून आवश्यक रुग्णांना पुढील उपचारासाठी सल्ला देण्यात आला.
जागतिक स्तनपान सप्ताहानिमित्त आयोजित विशेष समुपदेशन सत्रात नवजात बालकांसाठी स्तनपानाचे महत्त्व, जन्मानंतरच्या पहिल्या सहा महिन्यांपर्यंत केवळ स्तनपान देण्याचे फायदे तसेच माता आणि बालकाच्या आरोग्यातील स्तनपानाची भूमिका याविषयी सखोल माहिती देण्यात आली.
आयोजकांनी सांगितले की, हे शिबिर १ ते १० ऑगस्ट दरम्यान दररोज सकाळी १० ते दुपारी १ या वेळेत सुरू राहणार असून अधिकाधिक महिलांनी या संधीचा लाभ घ्यावा.
शस्त्रक्रियेची आवश्यकता असलेल्या महिला रुग्णांवर डॉ. उल्हास पाटील वैद्यकीय महाविद्यालय व रुग्णालय, जळगाव येथे सवलतीच्या दरात उपचाराची सुविधा उपलब्ध करून देण्यात येणार आहे. अधिक माहितीसाठी दिक्षा सुरे यांच्याशी ९६८९६८०९०१ या क्रमांकावर संपर्क साधण्याचे आवाहन करण्यात आले आहे.
कोणत्याही टिप्पण्या नाहीत