पाळधी-तरसोद बायपासवरील रस्ता खचला; मंत्री गिरीश महाजन व पालकमंत्री गुलाबराव पाटील यांनी केली पाहणी, सखोल चौकशीचे आदेश

पाळधी-तरसोद बायपासवरील रस्ता खचला; मंत्री गिरीश महाजन व पालकमंत्री गुलाबराव पाटील यांनी केली पाहणी, सखोल चौकशीचे आदेश

जळगाव लेवाजगत न्यूज प्रतिनिधी-

जळगाव जिल्ह्यातील पाळधी-तरसोद बायपास मार्गावर मुसळधार पावसामुळे रस्त्याचा काही भाग खचल्याची गंभीर घटना समोर आली असून, या घटनेची राज्य शासनाने तातडीने दखल घेतली आहे. राज्याचे ग्रामविकास व पंचायतराज मंत्री गिरीश महाजन आणि जळगावचे पालकमंत्री गुलाबराव पाटील यांनी घटनास्थळी भेट देत परिस्थितीची प्रत्यक्ष पाहणी केली. यावेळी संबंधित विभागाच्या अधिकाऱ्यांकडून घटनेची सविस्तर माहिती घेण्यात आली.

साप्ताहिक लेवा जगत वर्ष 19 अंक नंबर 42 खाली दिलेल्या लिंक वर क्लिक करा व बघा👇

https://lewajagat.epaper99.com//?url=home&ced=1&date=03/08/2026

पाहणीदरम्यान रस्त्याच्या बांधकामाच्या गुणवत्तेबाबत प्राथमिक स्तरावर गंभीर प्रश्न उपस्थित करण्यात आले. विशेष म्हणजे या प्रकल्पाबाबत यापूर्वीही विविध तक्रारी प्राप्त झाल्या होत्या. त्यामुळे संपूर्ण प्रकरणाची निष्पक्ष, पारदर्शक आणि सखोल चौकशी करण्याचे आदेश संबंधित यंत्रणांना देण्यात आले आहेत. चौकशीत दोषी आढळणाऱ्यांवर नियमानुसार कठोर कारवाई करण्यात येईल, असेही स्पष्ट करण्यात आले.

पाळधी-तरसोद बायपास हा जळगाव जिल्ह्यातील महत्त्वाचा मार्ग असून या मार्गावरून दररोज मोठ्या प्रमाणात हलक्या व जड वाहनांची वाहतूक होते. अशा परिस्थितीत रस्ता खचल्याने वाहनचालकांच्या सुरक्षेचा प्रश्न निर्माण झाला आहे. त्यामुळे नुकसानग्रस्त भागाची तातडीने दुरुस्ती करून वाहतूक सुरक्षित करण्याच्या सूचना संबंधित अधिकाऱ्यांना देण्यात आल्या.

यावेळी आमदार सुरेश भोळे, जिल्हाधिकारी रोहन घुगे, महापौर दीपमाला काळे, सार्वजनिक बांधकाम विभागाचे अधिकारी तसेच इतर संबंधित विभागांचे अधिकारी उपस्थित होते. अधिकाऱ्यांनी घटनास्थळी तांत्रिक पाहणी करून रस्ता खचण्यामागील कारणांचा अहवाल लवकरात लवकर सादर करण्याचे आश्वासन दिले.

दरम्यान, मुसळधार पावसाच्या पार्श्वभूमीवर जिल्ह्यातील इतर प्रमुख रस्ते, पूल आणि सार्वजनिक पायाभूत सुविधांचीही तपासणी करण्याच्या सूचना देण्यात आल्या असून नागरिकांनी आवश्यक ती खबरदारी घ्यावी, असे आवाहन प्रशासनाकडून करण्यात आले आहे.