परभणी जिल्हा हादरला! एकाच दिवशी नदीपात्रात दोन महिलांचे मृतदेह सापडले

लेवाजगत न्यूज:- राहटी येथील नदीवरील पुलाजवळ पूर्णा नदीपात्रामध्ये एका पन्नास वर्षीय महिलेचा मृतदेह तर सोनपेठ तालुक्यातील गंगापिंपरी येथील गोदावरी नदीपात्रात एका अनोळखी महिलेचा मृतदेह तरंगताना आढळून आल्यामुळे परभणी जिल्ह्यामध्ये एकच खळबळ उडाली आहे. पोलिसांनी घटनास्थळी भेट देऊन पंचनामा केला असून मृतदेहाची ओळख पटवण्याचे काम सुरू आहे. 

पूर्णा नदीपात्रात एका महिलेचा मृतदेह तरंगत असल्याचे लक्षात आल्यानंतर सदर मृतदेह पाण्याबाहेर काढण्यात आला. नदी किनारी महिलेच्या चपला दिसून आल्या. चाळीस ते पन्नास या दरम्यान वय असलेल्या या महिलेने आत्महत्या केली असेल, असा अंदाज व्यक्त करण्यात येत आहे. 

घटनेची माहिती पूर्णा पोलीसांना देण्यात आली. पोलीस कर्मचारी कवठेकर यांनी घटनास्थळी धाव घेत पंचनामा केला. मृतदेहाची ओळख पटविण्याचे काम सुरु आहे. सदर महिलेविषयी कोणाला काही माहिती असेल तर पूर्णा पोलीसांशी संपर्क साधावा, असे आवाहन करण्यात आले आहे. पावसामुळे पूर्णा नदी दुथडी भरुन वाहत आहे.

तर दुसरी घटना सोनपेठ तालुक्यातील गंगापिंपरी येथे घडली आहे. गोदावरी नदी दुथडी भरुन वाहत आहे. गंगापिंपरी येथे नदीपात्रात एका ३५ वर्षीय महिलेचा मृतदेह सापडला आहे. याची माहिती ग्रामस्थांनी पोलीस प्रशासनाला दिली. गावकऱ्यांच्या मदतीने मृतदेह पाण्याबाहेर काढण्यात आला. यासाठी माऊली रोडे, शिवाजी उफाडे यांनी मदत केली. 

 महिलेची ओळख पटू शकलेली नाही. घटनास्थळी सपोनि. संदिप बोरकर, पोउपनि प्रभाकर गवारे, पोलीस पाटील नवनाथ रोडे यांची उपस्थिती होती. सदर प्रकरणी पोलीस पाटील नवनाथ तुळशीराम रोडे यांच्या खबरीवरुन सोनपेठ पोलीसात अकस्मात मृत्यूची नोंद झाली आहे. तपास पोउपनि गवारे करत आहेत. महिलेच्या मृतदेहावर नगर परिषद प्रशासनाच्यावतीने अंत्यसंस्कार करण्यात आले.