चालू लिफ्टमध्ये डोकं बाहेर काढणं जीवावर बेतलं ; लिफ्टचा दरवाजा बंद होऊन एकाचा मृत्यू

लेवाजगत न्युज मुंबई:-मुंबईत आणखी एक लिफ्टची दुर्घटना घडली आहे. बोरीवली परिसरातील एका वृद्धाचा लिफ्टमध्ये अडकल्याने दुर्दैवी मृत्यू झाला आहे. तब्बल पाच दिवस हे आजोबा मृत्यूशी झुंज देत होते मात्र शुक्रवारी त्यांचा मृत्यू झाला.

बोरीवली परिसरात राहणारे रतन पाटील हे त्यांच्या सोसायटीतील लिफ्टमध्ये अडकले होते. त्यावेळी त्यांच्यासोबत अजून चार जण होते. लिफ्टमध्ये अडकल्याने रतन पाटील हे गंभीर जखमी झाले होते. २ ऑक्टोबर रोजी रतन पाटील हे दूध घेऊन घरी परतत होते. त्यावेळी लिफ्ट दुसऱ्या मजल्यावर आल्यानंतर त्यांनी आपल्या खेळत असलेल्या नातवाला पाहण्यासाठी डोकं बाहेर काढलं. तितक्यात लिफ्टचा दरवाजा बंद झाला आणि ते दोन्ही दरवाजाच्यांमध्ये अडकले. पाटील हे लिफ्टमध्ये अडकल्यानंतर लिफ्ट तळमजल्यावर आली.

लिफ्ट तळमजल्यावर आल्यानंतर वॉचमॅनने चावीच्या सहाय्याने लिफ्टचा दरवाजा उघडला आणि आजोबांना बाहेर काढण्यात आले. घटनेवेळी त्यांची सून व पत्नी घरातच होते. तर नातू बाहेर खेळत होता. त्यावेळी त्याने आजोबा गंभीर जखमी झाल्याचं सांगितलं. रतन पाटील यांना तात्काळ नायर रुग्णालयात दाखल केले. मात्र, शुक्रवारी सात ऑक्टोबर रोजी त्यांचा मृत्यू झाला. या घटनेनंतर ही लिफ्ट रहिवाशांसाठी बंद ठेवण्यात आली आहे. तसंच, लिफ्टची शेवटची सर्व्हिसिंग सप्टेंबर २४ रोजी करण्यात आली होती. दरम्यान, या घटनेनंतर लिफ्ट दुरुस्त करुन घेण्याऐवजी लिफ्ट बदलण्यात यावी, असं रहिवाशांनी म्हटलं आहे. यासाठी कोटेशनही काढण्यात आलं आहे.

लिफ्टचा मेन्टनन्स कसा ठेवाल

इमारतीमध्ये लिफ्ट बसवण्यात आल्यानंतर तिचा वापर सुरू करायच्या आधी ती स्टेट इलेक्ट्रिसिटी डिपार्टमेंटमधील इंजिनीअरकडून सर्टिफाइड करुन घ्या.

लिफ्ट सुरू झाल्यानंतर त्याची वर्षाभरात त्याची तपासणी करण्यात यावी. जिथून लिफ्ट बसवण्यात आली आहे तिथूनच इनस्पेक्शन करण्यात यावं

लिफ्टचा वार्षिक मेन्टनन्स ठेवावा. ज्या कंपनीकडून लिफ्ट खरेदी केली आहे तिथूनच लिफ्टची तपासणी करण्यात यावी. किंवा ज्या थर्ड पार्टी कंत्राटदाराकाकडून लिफ्ट इन्स्टॉल करण्यात आली आहे त्याच्याशी संपर्क साधावा.

या गोष्टींची काळजी घ्या

लिफ्टचं दार बंद होत असताना हात किंवा पायमध्ये टाकू नका. तसंच, लिफ्ट बंद होत असताना बाहेर पडू नका.

लिफ्टचे दार किंवा भिंतीकडे अधिक झुकू नका

एकदा लिफ्टमध्ये शिरल्यानंतर एकाठिकाणी उभे राहा. तसंच, लहान मुलांना उड्या मारण्यापासून रोखा

इमारतीतील फायर अलार्म सुरू झाला असेल तर लिफ्टचा वापर करु नका. खाली उतरण्यासाठी पायऱ्यांचा वापर करा.