नववीची विद्यार्थिनी शाळेच्या पहिल्या मजल्यावरून पडल्याने जखमी
नववीची विद्यार्थिनी शाळेच्या पहिल्या मजल्यावरून पडल्याने जखमी
लेवाजगत न्यूज जामनेर -येथील न्यू इंग्लिश स्कूलच्या पहिल्या मजल्यावरून पडल्याने, इयत्ता नववीतील विद्यार्थिनी मंगळवारी गंभीर जखमी झाली. जामनेर येथे खासगी रुग्णालयात प्रथमोपचार केल्यानंतर, पुढील उपचारासाठी विद्यार्थिनीला जळगाव येथे हलवले. टीना सतीश तुळसकर ही विद्यार्थिनी न्यू इंग्लिश स्कूलमध्ये इयत्ता नववीत शिकते. नेहमीप्रमाणे मंगळवारी ती शाळेत आली. शिक्षक वर्गात नसल्याने ती ११.३५ वाजता वर्गाबाहेर व्हरांड्यात आली. तेथून अचानक ती खाली पडल्याने मोठा आवाज आला. याच वेळी पोलिसांच्या सहकारी सोसायटीचे मतदान शाळेत सुरू होते. त्यामुळे शिक्षक आणि पोलिसांनी धाव घेत, तिला तातडीने खासगी रुग्णालयात दाखल केले. प्रथमोपचारानंतर तिला जळगावला हलवले. विद्यार्थिनीच्या कुटुंबीयांना माहिती मिळताच त्यांनी रुग्णालयात धाव घेतली. या घटनेमुळे तिच्या आईला भोवळ आली. विद्यार्थिनीच्या कमरेला, उजव्या पायाला व हाताला मार लागलेला आहे. ही घटना नेमकी कशी घडली याची माहिती स्पष्ट झाली नाही.
कोणत्याही टिप्पण्या नाहीत