गुरुमाऊली मोरेंवरील सर्व आरोप खोटे, दबावामुळे मी... असे केले महिला कृषी सहायक अधिकाऱ्याचा गौप्यस्फोट

लेवाजगत न्युज नाशिक:-सन २०२३ मधील खंडणी व व्हिडीओ प्रकरणात गुरुमाऊली अण्णासाहेब मोरे यांच्याविरुद्ध झालेले सर्व आरोप खोटे असून, हा प्रकार माझ्यावर काहींनी दबाव टाकून जीवे मारण्याची धमकी देत करवून घेतल्याचा धक्कादायक खुलासा कृषी सहायक अधिकारी सारिका सोनवणे यांनी केला आहे.

काय आहे प्रकरण?

संभाजी ब्रिगेड आणि भूमाता ब्रिगेडच्या तृप्ती देसाई यांच्याकडे मी कोणतीही तक्रार केलेली नाही. माझे व मोरे कुटुंबीयांच्या बदनामीचे त्यांनी षडयंत्र केले असून, त्यांच्याविरुद्ध कायदेशीर कारवाई करण्याचाही इशारा सोनवणे यांनी दिला आहे. ‘तुमचे आक्षेपार्ह व्हिडीओ व्हायरल करू,’ अशी धमकी देत स्वामी समर्थ गुरुपीठ विश्वस्त मंडळातील कार्यकारी सदस्याकडून एक कोटी रुपयांची खंडणी मागितल्याचे प्रकरण नोव्हेंबर २०२३ मध्ये घडले होते. त्या प्रकरणी सारिका बापूराव सोनवणे (वय ४२), मुलगा मोहित सोनवणे (२५), महिलेचा भाऊ विनोद सयाजी चव्हाण (४१, रा. देवळा) या संशयितांवर गंगापूर पोलिसांत गुन्हा नोंद आहे.

महिलेचं म्हणणं काय?

दरम्यान, ‘तत्कालीन खंडणी प्रकरण व मोरे कुटुंबीयांविरुद्ध झालेले आरोप हे माझ्यावर काही अधिकारी, पत्रकार व राजकारणी यांनी टाकलेल्या दबावातून करण्यात आले. मी स्वामी समर्थांची भक्त असून, गुरुमाऊली माझे गुरू आहेत. स्वामी समर्थ परिवाराशी माझे चांगले संबंध आहेत. त्यात कोणताही गैरप्रकार किंवा गैरवर्तन घडलेले नाही. मला व माझ्या मुलाला जीवे मारण्याची धमकी देत माझ्याकडून मोरेंविरुद्धच्या तक्रारी करण्यासह धमकविण्यात आले. पंचवटी पोलिसांत मी कोणतीही तक्रार दिलेली नाही. माझी त्या तक्रार अर्जावर स्वाक्षरी नाही,’ असा खुलासाही सोनवणे यांनी सोमवारी (दि. २०) पत्रकार परिषदेत केला.

दरम्यान, बीडच्या मस्साजोगचे सरपंच संतोष देशमुख यांच्या हत्येतील संशयित वाल्मिक कराड फरार असताना नाशिकच्या दिंडोरीतील श्री स्वामी समर्थ केंद्रात आल्याचे गुन्हे अन्वेषण विभागाच्या तपासात उघड झाले. त्यानंतर तृप्ती देसाईंसह संभाजी ब्रिगेडनेही केंद्रप्रमुखांवर गंभीर आरोप केले. यासह सन २०२३चे खंडणी व व्हिडीओ प्रकरणही उकरून काढले. त्यावरून संतप्त होत सोनवणे यांनी घडलेल्या प्रकाराचा खुलासा केला.

दरम्यान, ‘आमचा वाद मुंबई उच्च न्यायालयात सामंजस्याने मिटला आहे. माझ्यावरील दबावासंदर्भात कोर्टात मी जबाब दिला. त्यामुळे खंडणीच्या गुन्ह्यात मला जामीन मिळाला. मी सध्या शासकीय सेवेत असून, त्यावेळी धमकीसाठी वापरण्यात आलेला व्हिडीओ मॉर्फ केलेला होता’, असाही दावा सोनवणेंनी केला. यासह माझी बदनामी करण्याचा किंवा तत्कालीन प्रकरणात मला गोवण्याचा व चुकीचे अर्थ लावण्याचा प्रयत्न केल्यास संबंधितांवर कारवाईचा इशारा त्यांनी दिला. धमकविणाऱ्यांची नावे पोलिस आयुक्तांना दिली असून, मुख्यमंत्र्यांचीही भेट घेणार असल्याचा दावा सोनवणे यांनी केला. त्यांनी स्वत:च्या प्रकरणासह मोरेंविरुद्धचे सर्व आरोप फेटाळून लावल्याने इतर संघटना व मोरेंविरुद्ध आरोप करणारे अडचणीत आले आहेत.

‘गुरुमाऊली हे आकाच्या आकाचे आका’

दोन दिवसांपूर्वी संभाजी ब्रिगेडने ‘गुरुमाऊली हे आकाच्या आकाचे आका’ असल्याचा आरोप करीत अनेक दावे केले होते. सोमवारी ब्रिगेडचे महानगरप्रमुख प्रफुल्ल वाघ यांच्यासह सदस्यांनी पोलिस आयुक्त संदीप कर्णिक यांची भेट घेतली. त्यावेळी ‘मोरे यांचे शासनातील बड्या नेत्यांशी थेट संबंध आहेत. यापूर्वीही आम्हाला धमक्या आल्या आहेत. आमच्या जीवितास काही झाल्यास गुरुमाऊली मोरे व त्यांची तीन मुले जबाबदार राहतील,’ असे पत्र आयुक्तांना देण्यात आले.