महादेव मंदिरातील मुकुट व दागिने चोरीप्रकरणी आरोपी ४८ तासांत गजाआड; एमआयडीसी पोलिसांची कौतुकास्पद कामगिरी

 महादेव मंदिरातील मुकुट व दागिने चोरीप्रकरणी आरोपी ४८ तासांत गजाआड; एमआयडीसी पोलिसांची कौतुकास्पद कामगिरी

लेवाजगत न्यूज, जळगाव – शहरातील एमआयडीसी पोलीस ठाण्याच्या हद्दीत असलेल्या मुकुंदनगर परिसरात मानेश्वर महादेव मंदिरातील चांदीचे मुकुट व इतर दागिने चोरीला गेल्याची घटना उघडकीस आली होती. ही घटना फक्त दोन दिवसांत उकलून संबंधित दोघा आरोपींना अटक करण्यात एमआयडीसी पोलिसांना यश आले आहे. त्यांच्या कडून चोरलेला संपूर्ण मुद्देमालही हस्तगत करण्यात आला आहे.

ही घटना ११ जुलै रोजी उघडकीस आली होती. मंदिराच्या समोर राहणारे अरुण लक्ष्मण शेटे यांच्या ताब्यात महादेवाच्या पिंडीवरील चांदीचा मुकुट व इतर दागिने (एकूण किंमत ₹६१,५००/-) होते. सण-उत्सवाच्या वेळी हे दागिने पुन्हा मंदिरात ठेवले जात असतात. परंतु शेटे कुटुंब पुण्याला गेले असताना त्यांच्या बंद घरातून अज्ञात चोरट्याने हे दागिने चोरले. या प्रकरणी एमआयडीसी पोलीस ठाण्यात गुन्हा रजि. नं. ५०८/२०२५ भा.दं.वि. कलम ३३१(३), ३३१(४), ३०५ (a) अन्वये गुन्हा दाखल करण्यात आला होता.

या गंभीर घटनेची तातडीने दखल घेत पोलीस निरीक्षक बबन आव्हाड यांच्या मार्गदर्शनाखाली गुन्हे शोध पथक स्थापन करण्यात आले. पोउनि चंद्रकांत धनके यांच्या नेतृत्वाखालील पथकात प्रदीप चौधरी, गिरीश पाटील, रतन गिते, गणेश टाकेर, नितीन ठाकूर आणि राहुल घेटे यांचा समावेश होता. पथकाने परिसरातील रस्त्यावरील व चौकातील सर्व सीसीटीव्ही फुटेज तपासले. या तपासातून दोन संशयित व्यक्तींची ओळख पटवण्यात आली.

त्याआधारे पोलीसांनी शाकीब ताजुद्दीन शेख (वय २४, रा. कासमवाडी, जळगाव) आणि राहुल शेखर रावळकर (वय ३२, रा. जाखनी नगर, कंजरवाडा, जळगाव) यांना ताब्यात घेतले. चौकशीत त्यांनी गुन्ह्याची कबुली दिली. त्यांच्याकडून चोरीस गेलेला सर्व मुद्देमाल हस्तगत करण्यात आले असून आरोपींना अटक करण्यात आली आहे.

ही संपूर्ण कारवाई पोलीस अधीक्षक महेश्वर रेड्डी, अप्पर पोलीस अधीक्षक अशोक नखाते, पोलीस उपअधीक्षक संदीप गावित यांच्या मार्गदर्शनाखाली पार पडली. पुढील तपास पोहेकॉ गिरीश पाटील आणि पोकॉ योगेश घुगे करीत आहेत.