जळगाव जिल्ह्यातून भाजपचे तिसरे खासदार ॲड. उज्ज्वल निकम यांची राज्यसभेवर नियुक्ती —
ॲड. उज्ज्वल निकम यांची राज्यसभेवर नियुक्ती — जळगाव जिल्ह्यातून भाजपचे तिसरे खासदार
लेवाजगत न्यूज जळगाव -विशेष सरकारी वकील म्हणून देशभरात प्रसिद्ध असलेल्या ॲड. उज्ज्वल निकम यांची नुकतीच राज्यसभेवर नियुक्ती झाली असून, त्यामुळे जळगाव जिल्ह्यात भाजपकडून तिसरे खासदार मिळाले आहेत. त्यांच्या नियुक्तीमुळे जिल्ह्याच्या राजकीय पटलावर एक नव्या युगाची सुरुवात झाली आहे.
पुरोगामी विचारसरणी असलेल्या निकम कुटुंबाचे मूळ गाव चोपडा तालुक्यातील माचला हे असून, त्या ठिकाणी त्यांची सुमारे २०० एकर शेती आहे. बॅरिस्टर देवराव निकम हे या कुटुंबाचे अध्वर्यू होते. शिक्षण व सहकार क्षेत्रात त्यांचे मोलाचे योगदान होते. राज्यातील प्रत्येक जिल्ह्यात सहकार प्रशिक्षण केंद्रांची स्थापना करण्याची संकल्पना त्यांनीच प्रत्यक्षात आणली होती. ते जळगाव जिल्हा मराठा विद्या प्रसारक सहकारी समाजाचे अध्यक्ष होते तसेच १९६२ ते १९६७ या कालावधीत चोपडा मतदारसंघाचे आमदारही राहिले.
बॅरिस्टर निकम यांच्यानंतर त्यांचे ज्येष्ठ पुत्र दिलीप निकम यांनी जिल्हा मार्केटिंग फेडरेशनचे अध्यक्षपद सांभाळले. त्यांच्या पत्नी शैलजा निकम या देखील राजकारण व सहकार क्षेत्रात सक्रिय होत्या. त्या जिल्हा परिषद सदस्य, कृभकोच्या संचालक, जिल्हा सहकारी बँकेच्या संचालक अशा विविध जबाबदाऱ्या त्यांनी सांभाळल्या आहेत.
निकम कुटुंबाची तिसरी पिढी म्हणून रोहित दिलीप निकम हे सध्या सहकार क्षेत्रात सक्रिय असून, राज्य मार्केटिंग फेडरेशनचे उपाध्यक्ष, जिल्हा मार्केटिंग फेडरेशनचे अध्यक्ष, कॉटन फेडरेशन तसेच दूध संघाचे संचालक म्हणून ते कार्यरत आहेत.
दरम्यान, ॲड. उज्ज्वल निकम यांनी वडिलांचा वकिलीचा वारसा समर्थपणे चालवला. त्यांनी मुंबई बॉम्बस्फोट, कसाब खटला, प्रद्युम्न मर्डर केस यांसारख्या अनेक गाजलेल्या प्रकरणांत विशेष सरकारी वकील म्हणून काम केले. त्यांच्या पत्नी ज्योती निकम या गृहिणी असून, त्यांचा मुलगा अनिकेत निकम हा मुंबई उच्च न्यायालयात यशस्वी वकील आहे.
राजकीय घडामोडींच्या पार्श्वभूमीवर, काही वर्षांपूर्वी राष्ट्रवादी काँग्रेसने त्यांना पक्षात सहभागी होण्यासाठी आग्रह केला होता, मात्र त्यांनी नकार दिला. २०१९ मधील लोकसभा निवडणुकीत भाजपने त्यांना उत्तर-मध्य मुंबई मतदारसंघातून उमेदवारी दिली होती. त्या निवडणुकीत पराभूत झाल्यानंतर त्यांनी पुन्हा वकिली व्यवसायाकडे लक्ष दिले. मात्र, आता थेट राज्यसभेवर नियुक्ती झाल्यामुळे त्यांचा राजकीय प्रवास नव्याने सुरू झाला आहे.
लेखक: लेवाजगत न्यूज प्रतिनिधी
दिनांक: १३ जुलै २०२५
स्थळ: जळगाव
कोणत्याही टिप्पण्‍या नाहीत