सेवा व महसूल पंधरवाडा प्रभावीपणे राबवावा – केंद्रीय राज्यमंत्री रक्षा खडसे

सेवा व महसूल पंधरवाडा प्रभावीपणे राबवावा – केंद्रीय राज्यमंत्री रक्षा खडसे

लेवाजगत न्यूज जळगाव, दि. २ सप्टेंबर – शासनाच्या छत्रपती शिवाजी महाराज अभियानांतर्गत १७ सप्टेंबर ते २ ऑक्टोबर २०२५ दरम्यान जिल्ह्यात आयोजित होणाऱ्या सेवा पंधरवाडा व महसूल पंधरवाडा उपक्रमाची प्रभावी अंमलबजावणी करण्याचे निर्देश केंद्रीय क्रीडा व युवक कल्याण राज्यमंत्री श्रीमती रक्षा खडसे यांनी दिले.

यासंदर्भातील पूर्वतयारी बैठकीचे आयोजन जिल्हाधिकारी कार्यालयातील नियोजन भवन येथे करण्यात आले. यावेळी वस्त्रोद्योग मंत्री संजय सावकारे, खासदार स्मिता वाघ, आमदार चंद्रकांत सोनवणे, आमदार मंगेश चव्हाण, जिल्हाधिकारी आयुष प्रसाद, महापालिका आयुक्त ज्ञानेश्वर ढेरे यांच्यासह अनेक मान्यवर उपस्थित होते.

राज्यमंत्री खडसे म्हणाल्या की, या पंधरवड्यात सर्व विभागांनी समन्वय साधून कार्यवाही करावी. खासदार-आमदार यांच्या उपस्थितीत प्रत्येक तालुक्यात कार्यक्रमांचे आयोजन करून विविध केंद्र व राज्य शासन योजनांचा लाभ लाभार्थ्यांपर्यंत पोहोचवावा. तीन टप्प्यांत हा उपक्रम राबविला जाणार असून पहिल्या टप्प्यात पाणंद रस्ते मोहिम, दुसऱ्या टप्प्यात सर्वांसाठी घरकुल उपक्रम तर तिसऱ्या टप्प्यात नाविन्यपूर्ण उपक्रम राबवले जातील.

एक पेड माँ के नाम या उपक्रमांतर्गत महाविद्यालयीन युवकांच्या सहभागातून वृक्षारोपण होणार आहे. याशिवाय छत्रपती शिवाजी महाराज महा समाधान शिबीर, रोजगार मेळावे, वैद्यकीय शिबिरे तसेच जातीचे, उत्पन्नाचे व रहिवास प्रमाणपत्रांचे वितरण करण्यात येणार आहे. नागरिकांपर्यंत थेट लाभ पोहोचविण्यासाठी सुक्ष्म नियोजन करून कार्यक्रम यशस्वी करावा, असेही त्या म्हणाल्या.

या निमित्त खासदार क्रीडा महोत्सवाचे आयोजन करण्यात येणार असून क्रीडा विभागाच्या विविध योजनांची जनजागृती यावेळी केली जाईल. यासाठी विभागीय अधिकारी व क्रीडा संघटनांनी नियोजन करण्याचे निर्देशही त्यांनी दिले.

खासदार स्मिता वाघ, आमदार मंगेश चव्हाण व आमदार चंद्रकांत सोनवणे यांनी बैठकीत उपयुक्त सूचना मांडल्या. प्रास्ताविकात जिल्हाधिकारी आयुष प्रसाद यांनी सेवा व महसूल पंधरवड्याद्वारे जिल्ह्यातील नागरिकांना विविध योजनांचा थेट लाभ मिळावा यासाठी जिल्हा प्रशासन कटिबद्ध असल्याचे सांगितले.

बैठकीच्या शेवटी राज्यमंत्री खडसे यांच्या हस्ते वैद्यकीय क्षेत्रात उल्लेखनीय कार्य करणाऱ्या संस्थांचा तसेच राष्ट्रीय खेळाडूंचा प्रशस्तीपत्र देवून गौरव करण्यात आला.