सावदा पालिकेत माजी नगराध्यक्ष, उपनगराध्यक्ष व नगरसेवकांची ‘पुन्हा एन्ट्री’; अनुभवी नेतृत्वामुळे राजकारणाला नवे वळण

लेवाजगत न्युज सावदा:-

सावदा नगरपरिषद सार्वत्रिक निवडणूक २०२५ च्या निकालानंतर पालिकेच्या राजकारणात अनुभवाचे वजन पुन्हा वाढले आहे. या निवडणुकीत माजी नगराध्यक्ष, माजी उपनगराध्यक्ष तसेच अनेक माजी नगरसेवक व नगरसेविकांनी पुन्हा एकदा सभागृहात प्रवेश मिळवला, त्यामुळे नव्या नगरपरिषदेवर अनुभवी नेतृत्वाचा ठसा उमटणार असल्याचे स्पष्ट झाले आहे.

माजी नगराध्यक्षांची दमदार पुनरागमन

या निवडणुकीत माजी नगराध्यक्ष राजेश गजानन वानखेडे यांनी पुन्हा एकदा नगरसेवक म्हणून निवडून येत आपले राजकीय वजन सिद्ध केले आहे. प्रशासकीय अनुभव, शहराच्या विकासकामांचा अभ्यास आणि जनसंपर्काच्या जोरावर त्यांनी मतदारांचा विश्वास कायम राखला आहे.

माजी उपनगराध्यक्षांचीही पुन्हा एन्ट्री

तसेच माजी उपनगराध्यक्ष श्याम अविनाश अकोले यांनीही या निवडणुकीत यश मिळवत पालिकेत पुनरागमन केले आहे. त्यांच्या अनुभवामुळे सभागृहातील चर्चांना दिशा मिळेल, अशी अपेक्षा व्यक्त केली जात आहे.

अनुभवी महिला नेतृत्व पुन्हा सक्रिय

या निवडणुकीत माजी नगरसेविका विजया कुशल जावळे, जयश्री अतुल नेहते आणि रेखा राजेश वानखेडे यांनी पुन्हा एकदा विजय मिळवत पालिकेत प्रवेश केला आहे. या तिघींच्या पुनरागमनामुळे महिला नेतृत्वाचा अनुभव व प्रभाव नव्या सभागृहात अधिक बळकट झाला आहे.

माजी नगरसेवकांचीही पुनरागमन

पुरुष नगरसेवकांमध्ये माजी नगरसेवक फिरोजखा अबदार खा तसेच फिरोजखान हबीबुल्ला खान पठाण यांनीही पुन्हा एकदा मतदारांचा विश्वास संपादन करत निवडणूक जिंकली आहे. त्यांच्या अनुभवाचा फायदा विकासकामे व सभागृहातील निर्णयप्रक्रियेत निश्चितच होणार असल्याचे बोलले जात आहे.

पालिकेच्या कारभारात अनुभवाची ताकद

नव्या नगरपरिषदेतील लोकनियुक्त नगराध्यक्ष, विविध पक्षांचे संख्याबळ आणि या अनुभवी माजी पदाधिकाऱ्यांची पुनरागमन यामुळे पालिकेच्या कामकाजाला गती मिळेल, अशी अपेक्षा नागरिक व्यक्त करत आहेत. विकासकामे, पाणीपुरवठा, स्वच्छता, रस्ते व नागरी सुविधांबाबत अनुभवी लोकप्रतिनिधींची भूमिका निर्णायक ठरणार आहे.

एकूणच, सावदा पालिकेच्या नव्या सभागृहात नवे चेहरे आणि जुने अनुभवी नेतृत्व यांचा संगम घडून आला असून, शहराच्या विकासासाठी हे नेतृत्व कितपत प्रभावी ठरते, याकडे आता सर्वांचे लक्ष लागून राहिले आहे.