सावद्यात ‘भारत गादी भंडार’ला भीषण आग; सुमारे तीन लाखांचे नुकसान
सावद्यात ‘भारत गादी भंडार’ला भीषण आग; सुमारे तीन लाखांचे नुकसान
सावदा, लेवाजगत न्यूज प्रतिनिधी : रावेर तालुक्यातील सावदा शहरातील बसस्थानक परिसरात असलेल्या ‘भारत गादी भंडार’ या दुकानाला अचानक आग लागून मोठे नुकसान झाल्याची घटना शुक्रवारी (दि. १३ मार्च २०२६) दुपारी घडली. या आगीत दुकानातील गाद्या व इतर साहित्य जळून खाक झाले असून सुमारे तीन लाख रुपयांचे नुकसान झाल्याचा प्राथमिक अंदाज व्यक्त करण्यात येत आहे. या घटनेमुळे परिसरात काही काळ घबराटीचे वातावरण निर्माण झाले होते.
मिळालेल्या माहितीनुसार, सावदा शहरातील बसस्टँड परिसरात एस. के. रेडियम दुकानाच्या शेजारी असलेल्या भारत गादी भंडार या दुकानातून अचानक धूर व ज्वाळा बाहेर येताना दिसल्याने स्थानिक नागरिकांमध्ये खळबळ उडाली. दुपारी अंदाजे १ ते २ वाजेच्या दरम्यान ही घटना घडली. परिस्थितीची गंभीरता लक्षात घेऊन नागरिकांनी तात्काळ सावदा नगरपालिकेच्या अग्निशामक दलाला माहिती दिली.
घटनेची माहिती मिळताच सावदा नगरपालिकेचे अग्निशामक दल तातडीने घटनास्थळी दाखल झाले. अग्निशामक जवानांनी तत्परतेने आग विझवण्याचे प्रयत्न सुरू केले. काही वेळाच्या अथक प्रयत्नांनंतर आग नियंत्रणात आणण्यात यश आले. वेळीच अग्निशामक दलाने कारवाई केल्यामुळे आग इतर दुकानांपर्यंत पसरण्यापासून रोखता आली.
या आगीत कोणतीही जीवितहानी झाली नसली तरी दुकानातील मोठ्या प्रमाणावर गाद्या व इतर साहित्य जळून खाक झाले आहे. त्यामुळे दुकानदाराचे आर्थिक नुकसान मोठ्या प्रमाणावर झाल्याचे सांगितले जात आहे. घटनेनंतर परिसरातील नागरिकांनी मोठ्या संख्येने घटनास्थळी गर्दी केली होती.
दरम्यान, आग लागण्याचे नेमके कारण अद्याप स्पष्ट झालेले नसले तरी शॉर्टसर्किटमुळे आग लागली असावी, असा प्राथमिक अंदाज व्यक्त करण्यात येत आहे. संबंधित यंत्रणेकडून या घटनेची पुढील चौकशी सुरू असून नुकसानाचा पंचनामा करण्यात येणार असल्याची माहिती मिळाली आहे.
कोणत्याही टिप्पण्या नाहीत