वैभव सूर्यवंशीच्या वादळी अर्धशतकाने राजस्थानचा दणदणीत विजय

 

वैभव सूर्यवंशीच्या वादळी अर्धशतकाने राजस्थानचा दणदणीत विजय

मुंबई (गुरुदत्त वाकदेकर): बारसापारा क्रिकेट स्टेडियम येथे इंडियन प्रीमियर लीगच्या तिसऱ्या टी-२० सामन्यात राजस्थान रॉयल्सने चेन्नई सुपर किंग्जवर ८ विकेट्सने शानदार विजय मिळवला. १२८ धावांचे लक्ष्य राजस्थानने केवळ १२.१ षटकांत १२८/२ असे गाठत ४७ चेंडू राखून सामना आपल्या नावावर केला. या विजयाचा केंद्रबिंदू ठरला १५ वर्षांचा वैभव सूर्यवंशी, ज्याने अवघ्या १७ चेंडूत ५२ धावांची वादळी खेळी साकारली.

चेन्नई सुपर किंग्जने प्रथम फलंदाजी करत १९.४ षटकांत १२७ धावांत सर्वबाद अशी मजल मारली. सुरुवातीलाच संजू सॅमसन ७ चेंडूत ६, रुतुराज गायकवाड (कर्णधार) ११ चेंडूत ६ आणि आयुष म्हात्रे शून्यावर बाद झाल्याने डाव अडखळला. मॅथ्यू शॉर्ट २, सरफराज खान १७, कार्तिक शर्मा १८ आणि शिवम दुबे ६ यांना मोठी खेळी करता आली नाही. मधल्या फळीत जेमी ओव्हर्टनने ३६ चेंडूत ४३ धावा करत प्रतिकार केला. अंशुल कंबोज १० चेंडूत ७ धावांवर नाबाद राहिला. अतिरिक्त १६ धावांची भर पडली.

राजस्थानच्या गोलंदाजीत जॉफ्रा आर्चरने ४ षटकांत १९ धावा देत २ विकेट्स, नँड्रे बर्गरने २६ धावांत २ विकेट्स, तर रवींद्र जडेजा २/१८ आणि रवि बिश्नोई १/१६ यांनी अचूक मारा केला. संदीप शर्मा आणि बृजेश शर्मा यांनीही प्रत्येकी १ बळी घेत चेन्नईला मोठ्या धावसंख्येपासून रोखले.

लक्ष्याचा पाठलाग करताना राजस्थानची सुरुवात धडाकेबाज झाली. वैभव सूर्यवंशीने १७ चेंडूत ५२ धावा करत सामना पावरप्लेमध्येच राजस्थानच्या बाजूला झुकवला. त्याच्या खेळीत ४ चौकार आणि ५ षटकार होते. ३०५.८८ चा स्ट्राइक रेट हा सामन्यातील सर्वात ठळक ठसा ठरला. यशस्वी जैस्वाल ३१ चेंडूत २७ धावांवर नाबाद राहिला. ध्रुव जुरेलने ९ चेंडूत १८ धावा केल्या, तर कर्णधार रियान पराग ९ चेंडूत १३ धावांवर नाबाद राहिला.

सामन्यानंतर वैभव सूर्यवंशी म्हणाला, “१५ व्या वाढदिवशी केकपासून दूर राहण्यासाठी मी लवकर झोपलो. आज चेंडू व्यवस्थित बॅटवर येत होता. पावरप्लेमध्येच सामना संपवण्याची योजना होती. संघ व्यवस्थापनाने माझ्या नैसर्गिक खेळाला पाठबळ दिले.”

चेन्नईचा कर्णधार रुतुराज गायकवाड म्हणाला, “सुरुवातीची परिस्थिती कठीण होती. जॉफ्रा आणि बर्गरचा सामना सोपा नव्हता. आधुनिक टी-२० मध्ये किती धावा पुरेशा ठरतील, हे सांगणे अवघड असते. हा पराभव मागे टाकून पुढच्या सामन्यावर लक्ष केंद्रित करू.”

या सामन्यात काही महत्त्वाचे विक्रमही नोंदले गेले. वैभव सूर्यवंशी आयपीएल २०२६ मधील सर्वात जलद अर्धशतक करणाऱ्या सर्वात तरुण फलंदाजांपैकी एक ठरला. राजस्थानने १२८ धावांचे लक्ष्य १२.१ षटकांत गाठत हंगामातील सर्वात वेगवान यशस्वी धावांचा पाठलाग केला. ४७ चेंडू राखून मिळवलेला हा विजय राजस्थानच्या नेट रनरेटसाठीही मोठा ठरला.

या विजयामुळे राजस्थान रॉयल्सचा आत्मविश्वास उंचावला असून युवा खेळाडूंच्या कामगिरीने संघ व्यवस्थापनाला मोठा दिलासा मिळाला आहे.

उद्या स्पर्धेचा पुढील सामना पंजाब किंग्स आणि गुजरात टायटन्स यांच्यात महाराजा यादविंद्रसिंह इंटरनॅशनल क्रिकेट स्टेडियम, चंदीगड येथे सायंकाळी ७:३० वाजता रंगणार आहे. सलग मोठ्या धावसंख्येचे सामने पाहता हा सामना देखील फलंदाजांसाठी मेजवानी ठरण्याची शक्यता आहे.