अन्न व श्वासनलिकेवरील जोखमीच्या शस्त्रक्रियेने वाचले नवजात शिशुचे प्राण दुर्मिळ ट्रकीओ-इसोफेजियल फिस्टुलावर डॉ. उल्हास पाटील रुग्णालयात यशस्वी शस्त्रक्रिया
अन्न व श्वासनलिकेवरील जोखमीच्या शस्त्रक्रियेने वाचले नवजात शिशुचे प्राण
दुर्मिळ ट्रकीओ-इसोफेजियल फिस्टुलावर डॉ. उल्हास पाटील रुग्णालयात यशस्वी शस्त्रक्रिया
जळगाव (प्रतिनिधी) – जन्मत:च गंभीर आजाराने त्रस्त असलेल्या नवजात शिशुचे प्राण जळगाव येथील डॉ. उल्हास पाटील रुग्णालयातील तज्ज्ञ डॉक्टरांनी यशस्वी शस्त्रक्रिया करून वाचविले. अन्ननलिका आणि श्वासनलिका एकमेकांना जोडल्या जाण्याने निर्माण झालेल्या दुर्मिळ ट्रकीओ-इसोफेजियल फिस्टुला या विकारावर करण्यात आलेल्या शस्त्रक्रियेमुळे शिशुला नवजीवन मिळाले.
याबाबत सविस्तर माहिती अशी की, भुसावळ तालुक्यातील प्रकाश भोई यांच्या घरी नवजात शिशुचा जन्म झाला. जन्मानंतर लगेचच शिशुच्या तोंडातून सतत फेस येत असल्याचे पालकांच्या लक्षात आले. तसेच शिशुला दूध पाजताना अडचण निर्माण होत होती. परिस्थिती गंभीर वाटल्याने शिशुला तातडीने जळगाव येथील डॉ. उल्हास पाटील रुग्णालयात दाखल करण्यात आले.
रुग्णालयातील बालरोग तज्ज्ञांनी प्राथमिक तपासणीदरम्यान शिशुला अन्ननलिकेचा गंभीर जन्मजात विकार असल्याचे निदान केले. पुढील तपासणीत ट्रकीओ-इसोफेजियल फिस्टुला असल्याचे स्पष्ट झाले. या आजारात अन्ननलिका आणि श्वासनलिका चुकीच्या पद्धतीने जोडल्या जातात, ज्यामुळे शिशुला श्वास घेण्यास व अन्न गिळण्यास अडचणी निर्माण होतात.
त्यानंतर शल्यचिकित्सक आणि बालरोग तज्ज्ञांच्या टीमने अत्यंत जोखमीची शस्त्रक्रिया यशस्वीरीत्या पार पाडली. शस्त्रक्रियेनंतर शिशुची प्रकृती स्थिर असून त्याच्यावर अतिदक्षता विभागात उपचार सुरू आहेत.
या यशस्वी शस्त्रक्रियेमुळे वैद्यकीय क्षेत्रात कौतुक होत असून संबंधित डॉक्टरांचे अभिनंदन केले जात आहे.
कोणत्याही टिप्पण्या नाहीत