बार्कलेज लाइफ स्किल ट्रेनिंग अंतर्गत सॉफ्ट स्किल डेव्हलपमेंट कार्यक्रम उत्साहात संपन्न गोदावरी कॉलेज ऑफ नर्सिंगचा विद्यार्थ्यांच्या सर्वांगीण विकासासाठी उपक्रम

 

बार्कलेज लाइफ स्किल ट्रेनिंग अंतर्गत सॉफ्ट स्किल डेव्हलपमेंट कार्यक्रम उत्साहात संपन्न

गोदावरी कॉलेज ऑफ नर्सिंगचा विद्यार्थ्यांच्या सर्वांगीण विकासासाठी उपक्रम

जळगाव लेवाजगत न्यूज प्रतिनिधी-

स्टुडंट्स सपोर्ट अँड प्रोग्रेशन सेल तथा जीटीटी फाउंडेशन, पुणे यांच्या संयुक्त विद्यमाने गोदावरी कॉलेज ऑफ नर्सिंगमध्ये विद्यार्थ्यांच्या सर्वांगीण विकासासाठी आयोजित करण्यात आलेला बार्कलेज लाइफ स्किल ट्रेनिंग अंतर्गत दोन दिवसीय सॉफ्ट स्किल डेव्हलपमेंट कार्यक्रम उत्साहपूर्ण वातावरणात संपन्न झाला.

दि. १ व २ जून २०२६ रोजी आयोजित या प्रशिक्षण कार्यक्रमाला महाविद्यालयाच्या प्राचार्या विशाखा गणविर, प्रशिक्षण कार्यक्रमाचे प्रमुख मार्गदर्शक, कॉर्पोरेट ट्रेनर व लीडरशिप कोच अक्षय भालेराव, तसेच प्राध्यापक व कर्मचारीवृंद उपस्थित होते.

या प्रशिक्षणादरम्यान अक्षय भालेराव यांनी विद्यार्थ्यांना संवाद कौशल्ये, व्यक्तिमत्त्व विकास, नेतृत्वगुण, आत्मविश्वास वृद्धी, संघभावना, व्यावसायिक शिष्टाचार आणि सोशल मीडियाचा जबाबदारीपूर्वक वापर यांसारख्या महत्त्वपूर्ण विषयांवर सखोल मार्गदर्शन केले. बदलत्या काळातील स्पर्धात्मक आणि व्यावसायिक जगात यशस्वी होण्यासाठी आवश्यक असलेल्या कौशल्यांची माहिती विद्यार्थ्यांना देण्यात आली.

कार्यक्रमात केवळ व्याख्यानांपुरते मर्यादित न राहता विविध आकर्षक सादरीकरणे, प्रात्यक्षिक उपक्रम, गटचर्चा, भूमिकानाट्य (रोल प्ले) आणि कौशल्यवर्धक कृतींचा समावेश करण्यात आला होता. त्यामुळे विद्यार्थ्यांना प्रत्यक्ष अनुभवातून शिकण्याची संधी मिळाली.

सहभागी विद्यार्थ्यांनी या सत्रांना अत्यंत माहितीपूर्ण, प्रेरणादायी आणि उपयुक्त असल्याची प्रतिक्रिया दिली. प्रशिक्षणातून प्राप्त झालेली व्यावहारिक कौशल्ये त्यांच्या शैक्षणिक वाटचालीसह भविष्यातील व्यावसायिक जीवनातही महत्त्वाची भूमिका बजावतील, असा विश्वास त्यांनी व्यक्त केला.

कार्यक्रमाच्या यशस्वी आयोजनासाठी महाविद्यालय प्रशासन, स्टुडंट्स सपोर्ट अँड प्रोग्रेशन सेल तसेच जीटीटी फाउंडेशन यांनी विशेष परिश्रम घेतले. समारोप प्रसंगी विद्यार्थ्यांनी या प्रशिक्षणातून मिळालेली कौशल्ये वैयक्तिक आणि व्यावसायिक प्रगतीसाठी प्रभावीपणे वापरण्याचा संकल्प व्यक्त केला.

या उपक्रमामुळे विद्यार्थ्यांच्या व्यक्तिमत्त्व विकासाला चालना मिळून त्यांच्यात आत्मविश्वास, नेतृत्वक्षमता आणि व्यावसायिकतेची जाणीव अधिक दृढ झाल्याचे मत उपस्थितांनी व्यक्त केले.