भाविकांची पिकअप विहिरीत कोसळून 8 जणांचा दुर्दैवी मृत्यू, 6 जण बचावले

भाविकांची पिकअप विहिरीत कोसळून 8 जणांचा दुर्दैवी मृत्यू, 6 जण बचावले

पंढरपूर | प्रतिनिधी

पंढरपूर तालुक्यातील रांजणी गावावर दुःखाचा डोंगर कोसळला असून म्हसवड येथील सिद्धनाथाच्या दर्शनावरून परतणाऱ्या भाविकांच्या पिकअप वाहनाला भीषण अपघात झाला. माळशिरस तालुक्यातील तांदळवाडी गावाजवळ पिकअप वाहन थेट विहिरीत कोसळल्याने आठ जणांचा दुर्दैवी मृत्यू झाला, तर सहा जणांना जीवदान मिळाले आहे.

मिळालेल्या माहितीनुसार, रांजणी गावातील 14 जण सिद्धनाथाच्या दर्शनासाठी म्हसवड येथे गेले होते. दर्शन आटोपून गावाकडे परतत असताना तांदळवाडी परिसरात चालकाचे वाहनावरील नियंत्रण सुटल्याने पिकअप रस्त्यालगतच्या विहिरीत कोसळली. अपघात इतका भीषण होता की, सुरुवातीला वाहनातील सर्व प्रवासी मृत्यूमुखी पडल्याची भीती व्यक्त केली जात होती.

दुर्घटनेची माहिती मिळताच स्थानिक ग्रामस्थांनी कोणत्याही शासकीय मदतीची वाट न पाहता घटनास्थळी धाव घेतली आणि बचावकार्य सुरू केले. ग्रामस्थांच्या अथक प्रयत्नांमुळे सहा जणांना जिवंत बाहेर काढण्यात यश आले. जखमींना तातडीने पंढरपूर येथील रुग्णालयात दाखल करण्यात आले असून त्यांच्यावर उपचार सुरू आहेत.

या दुर्घटनेत आठ जणांचा जागीच मृत्यू झाला. मृतांपैकी सर्वजण रांजणी गावातील असल्याने संपूर्ण गावावर शोककळा पसरली आहे. गावातील अनेक कुटुंबांवर दुःखाचा डोंगर कोसळला असून परिसरात हळहळ व्यक्त केली जात आहे.

दरम्यान, अपघातग्रस्त विहीर अत्यंत धोकादायक अवस्थेत असल्याची माहिती समोर आली आहे. या विहिरीबाबत यापूर्वीही संबंधितांकडे तक्रारी करण्यात आल्याचे सांगितले जात असून, सुरक्षेच्या उपाययोजनांकडे दुर्लक्ष झाल्याचा आरोप स्थानिकांकडून केला जात आहे. त्यामुळे या दुर्घटनेनंतर विहिरीच्या सुरक्षेचा प्रश्न पुन्हा ऐरणीवर आला आहे.

घटनेची माहिती मिळताच पोलीस, महसूल व आपत्ती व्यवस्थापन विभागाचे अधिकारी घटनास्थळी दाखल झाले. अपघाताचे नेमके कारण शोधण्यासाठी तपास सुरू करण्यात आला असून मृतांच्या कुटुंबीयांवर शोककळा पसरली आहे.

या हृदयद्रावक दुर्घटनेमुळे पंढरपूर तालुक्यासह संपूर्ण परिसरात हळहळ व्यक्त होत असून रांजणी गाव शोकसागरात बुडाले आहे.