४० वर्षीय महिलेला ओव्हेरियन कॅन्सरवर मात; डॉ. उल्हास पाटील रुग्णालयात पाच तासांची यशस्वी शस्त्रक्रिया

जळगाव | प्रतिनिधी

मध्य प्रदेशातील बुरहानपूर येथील ४० वर्षीय महिलेला ओव्हेरियन (अंडाशयाचा) कॅन्सरचे वेळेत निदान करून डॉ. उल्हास पाटील वैद्यकीय महाविद्यालय व रुग्णालयातील कॅन्सरतज्ज्ञ आणि स्त्रीरोगतज्ज्ञांच्या संयुक्त प्रयत्नातून यशस्वी शस्त्रक्रिया करण्यात आली. जवळपास पाच तास चाललेल्या अत्यंत गुंतागुंतीच्या शस्त्रक्रियेनंतर महिलेच्या अंडाशयाजवळील दोन मोठ्या कॅन्सरच्या गाठी यशस्वीरित्या काढण्यात आल्या असून रुग्णाची प्रकृती सध्या उत्तम आहे. पुढील उपचार सुरू असून रुग्ण कॅन्सरमुक्त जीवनाकडे वाटचाल करत आहे.

महिलेला गेल्या काही महिन्यांपासून सतत पोटदुखी, पोट फुगणे, भूक कमी लागणे आणि पोटाचा आकार वाढल्यासारखा वाटणे अशा तक्रारी होत्या. सुरुवातीला सामान्य आजार समजून विविध ठिकाणी उपचार घेतले, मात्र प्रकृतीत अपेक्षित सुधारणा झाली नाही. त्यामुळे त्यांनी जळगाव येथील डॉ. उल्हास पाटील वैद्यकीय महाविद्यालय व रुग्णालयात उपचारासाठी दाखल होण्याचा निर्णय घेतला.

रुग्णालयातील स्त्रीरोग विभागप्रमुख डॉ. माया आर्विकर यांच्या मार्गदर्शनाखाली डॉ. मृदुला मुंगसे आणि डॉ. प्राजक्ता पाटील यांनी महिलेची सखोल तपासणी केली. आवश्यक वैद्यकीय चाचण्यांनंतर सीटी स्कॅन करण्यात आला. या तपासणीत अंडाशयाजवळ संशयास्पद गाठी आढळून आल्या. त्यानंतर करण्यात आलेल्या पुढील तपासण्यांमध्ये महिलेला ओव्हेरियन कॅन्सर असल्याचे स्पष्ट झाले.

आजाराची गंभीरता लक्षात घेऊन कॅन्सरतज्ज्ञांना तातडीने उपचारासाठी पाचारण करण्यात आले. तज्ज्ञ डॉक्टरांच्या संयुक्त पथकाने सायटोरिडक्शन सर्जरी (Cytoreduction Surgery) आणि डि-बल्किंग सर्जरी (Debulking Surgery) करण्याचा निर्णय घेतला. जवळपास पाच तास चाललेल्या या शस्त्रक्रियेदरम्यान अंडाशयाजवळील दोन मोठ्या कॅन्सरग्रस्त गाठी यशस्वीरित्या काढण्यात आल्या. तसेच शरीरातील कॅन्सरग्रस्त ऊती शक्य तितक्या प्रमाणात काढून टाकण्यात आल्या.

शस्त्रक्रियेनंतर रुग्णाची प्रकृती स्थिर असून त्यांच्यावर आवश्यक औषधोपचार आणि पुढील कॅन्सर उपचार सुरू आहेत. डॉक्टरांच्या मते, वेळेत निदान आणि योग्य उपचार मिळाल्यामुळे रुग्णाला नवजीवन मिळाले आहे.

विशेष म्हणजे, लाखो रुपयांचा खर्च अपेक्षित असलेली ही शस्त्रक्रिया शासनाच्या आरोग्य योजनेंतर्गत रुग्णाला पूर्णपणे मोफत करण्यात आली. त्यामुळे आर्थिक अडचणी उपचारांच्या आड आल्या नाहीत. अत्याधुनिक वैद्यकीय सुविधा, अनुभवी तज्ज्ञ डॉक्टरांचे मार्गदर्शन आणि शासनाच्या आरोग्य योजनांचा लाभ यामुळे रुग्णाला वेळेत आणि प्रभावी उपचार मिळू शकले.

डॉक्टरांचे आवाहन

रुग्णालयातील कॅन्सरतज्ज्ञांनी सांगितले की, "ओव्हेरियन कॅन्सरची सुरुवातीची लक्षणे सामान्य पोटदुखी, पोट फुगणे, भूक कमी लागणे किंवा पोटाचा आकार वाढल्यासारखा वाटणे अशी असू शकतात. अनेक महिला या लक्षणांकडे दुर्लक्ष करतात. मात्र ही लक्षणे सातत्याने जाणवत असल्यास तातडीने स्त्रीरोगतज्ज्ञांचा सल्ला घ्यावा. योग्य वेळी निदान आणि शस्त्रक्रिया झाल्यास रुग्णाला चांगले व निरोगी आयुष्य मिळू शकते."

वेळेत निदानच ठरले जीवनदायी

या प्रकरणात सुरुवातीची लक्षणे गांभीर्याने घेतल्याने कॅन्सरचे निदान वेळेत झाले. तज्ज्ञ डॉक्टरांच्या समन्वयातून करण्यात आलेली यशस्वी शस्त्रक्रिया आणि त्यानंतरचे उपचार यामुळे संबंधित महिलेला नवजीवन मिळाले असून ही घटना वेळेत निदान आणि आधुनिक उपचारपद्धतीचे महत्त्व अधोरेखित करणारी ठरली आहे.