हत्या -बेलसवाडीत १९ वर्षीय तरुणाचा चाकूने वार करून खून

 

बेलसवाडीत १९ वर्षीय तरुणाचा चाकूने वार करून खून

मुक्ताईनगर तालुक्यातील बेलसवाडी येथे १९ वर्षीय अबुजर रफीक शेख याचा चाकूने वार करून खून झाल्याची धक्कादायक घटना १४ ऑगस्ट रोजी रात्री घडली. या प्रकरणी मुक्ताईनगर पोलीस ठाण्यात भारतीय न्याय संहितेच्या कलम १०३(१) अन्वये खुनाचा गुन्हा दाखल करण्यात आला आहे.

पोलिसांकडून मिळालेल्या माहितीनुसार, रात्री सुमारे ८.४५ वाजता बेलसवाडी येथील साबीर खान मेंबर यांच्या नवीन बांधकाम सुरू असलेल्या प्लॉटवर ही घटना घडली. मागील भांडणाच्या कारणावरून गावातील एका १७ वर्षीय युवकाने अबुजरच्या छातीत चाकूने वार केल्याचे तक्रारीत नमूद आहे.

या हल्ल्यात अबुजर गंभीर जखमी झाला. त्याला उपचारासाठी मुक्ताईनगर येथील उपजिल्हा रुग्णालयात दाखल करण्यात आले; मात्र उपचारादरम्यान त्याचा मृत्यू झाला.

घटनेची माहिती मिळताच मुक्ताईनगर पोलिसांनी तपास सुरू केला. डीवायएसपी नंदराज पाटील व पोलीस निरीक्षक आशीष अडसूळ यांच्या मार्गदर्शनाखाली पोहेकॉ. निलेश गोसावी तपास करीत आहेत.

या घटनेमुळे बेलसवाडी परिसरात खळबळ उडाली असून, तरुणाच्या मृत्यूने कुटुंबीयांवर दुःखाचा डोंगर कोसळला आहे. प्रकरणातील आरोपीविरुद्ध कायदेशीर कारवाई सुरू असून, खुनामागील नेमके कारण व इतर बाबींचा तपास पोलीस करीत आहेत.