ठेवीदाराचा प्रशासनाला इशारा; १५ ऑगस्टला आमरण उपोषणाची घोषणा, माहिती आयोगाच्या आदेशानंतरही माहिती न मिळाल्याचा आरोप महालक्ष्मी पतसंस्थेच्या प्रकरणी ठेवीदाराचा प्रशासनाला इशारा; १५ ऑगस्टला आमरण उपोषणाची घोषणा

 

माहिती आयोगाच्या आदेशानंतरही माहिती न मिळाल्याचा आरोप

महालक्ष्मी पतसंस्थेच्या प्रकरणी ठेवीदाराचा प्रशासनाला इशारा; १५ ऑगस्टला आमरण उपोषणाची घोषणा

लेवाजगत न्यूज सावदा : यावल येथील महालक्ष्मी नागरी सहकारी पतसंस्था व इतर पतसंस्थांशी संबंधित तक्रारींबाबत माहिती मागूनही राज्य माहिती आयोगाच्या आदेशानंतर माहिती मिळाली नसल्याचा आरोप सावदा येथील तक्रारदार राजेंद्र रमेश पाटील यांनी केला आहे. याबाबत त्यांनी जिल्हाधिकारी, जिल्हा पोलीस अधीक्षक आणि जिल्हा उपनिबंधक, सहकारी संस्था, जळगाव यांच्याकडे ३ ऑगस्ट २०२६ रोजी तक्रार अर्ज दाखल केला आहे.

पाटील यांच्या तक्रारीनुसार, त्यांनी माहितीच्या अधिकारांतर्गत महालक्ष्मी नागरी सहकारी पतसंस्था, यावल तसेच इतर पतसंस्थांशी संबंधित तक्रारींबाबत माहिती मागितली होती. मात्र माहिती न मिळाल्याने त्यांनी राज्य माहिती आयोगाच्या नाशिक खंडपीठाकडे अपील केले. त्यानंतर संबंधित माहिती ठरावीक मुदतीत देण्याचे आदेश झाल्याचे त्यांनी तक्रारीत नमूद केले आहे.

तक्रारदाराच्या म्हणण्यानुसार, आदेश होऊनही माहिती मिळाली नाही. त्यामुळे त्यांनी पुन्हा नाशिक खंडपीठाकडे तक्रार केली. त्यानंतर सहकार विभागाच्या जिल्हा उपनिबंधकांनी माहिती देण्याबाबत पुन्हा आदेश देण्यात आल्याचा दावा त्यांनी केला आहे. मात्र या आदेशालाही बराच कालावधी उलटून गेल्यानंतर अद्याप माहिती मिळाली नसल्याचे पाटील यांनी म्हटले आहे.

विभागीय सहनिबंधक, सहकारी संस्था, नाशिक विभाग यांनी १५ जून २०२६ रोजी संबंधित कार्यालयाला पत्र पाठविले असून, सहकार आयुक्त व निबंधक, सहकारी संस्था, महाराष्ट्र राज्य, पुणे यांनीही २९ जुलै २०२६ रोजी पत्र दिल्याचे तक्रारदाराने अर्जात नमूद केले आहे. या पत्रांच्या प्रती संबंधित अधिकाऱ्यांना माहिती व कार्यवाहीसाठी जोडल्याचेही त्यांनी म्हटले आहे.

राज्य माहिती आयोग, नाशिक खंडपीठ तसेच विभागीय सहनिबंधक यांच्या आदेशानुसार मागितलेली माहिती तात्काळ उपलब्ध करून द्यावी, अशी मागणी पाटील यांनी केली आहे. माहिती न मिळाल्यास सक्षम न्यायालयात दाद मागण्याबरोबरच या प्रकरणाची माहिती प्रसारमाध्यमे, वृत्तपत्रे, व्हॉट्सॲप व मोबाईल माध्यमातून प्रसिद्ध करण्याचा इशाराही त्यांनी दिला आहे.

तसेच, १५ ऑगस्ट २०२६ रोजी संबंधित कार्यालयासमोर किंवा जिल्हाधिकारी कार्यालय, जळगाव येथे आमरण उपोषणास बसण्याचा इशारा तक्रारदाराने दिला आहे. यासंदर्भात प्रशासन काय भूमिका घेते आणि मागितलेली माहिती उपलब्ध करून दिली जाते का, याकडे लक्ष लागले आहे.

दरम्यान, वरील आरोप व दावे हे तक्रारदाराने प्रशासनाकडे सादर केलेल्या अर्जातील आहेत. संबंधित सहकार विभाग अथवा पतसंस्थेची स्वतंत्र बाजू या अर्जात उपलब्ध नाही.