डॉ. उल्हास पाटील कॉलेज ऑफ फिजिओथेरपीमध्ये फिजिओथेरपी सप्ताह उत्साहात फिटनेस कॅम्प, क्विझ, 3D मॉडेल मेकिंग, ‘फिजिओ शार्क टँक’सह रक्तदान शिबिराचे आयोजन

डॉ. उल्हास पाटील कॉलेज ऑफ फिजिओथेरपीमध्ये फिजिओथेरपी सप्ताह उत्साहात

फिटनेस कॅम्प, क्विझ, 3D मॉडेल मेकिंग, ‘फिजिओ शार्क टँक’सह रक्तदान शिबिराचे आयोजन

जळगाव, प्रतिनिधी : डॉ. उल्हास पाटील कॉलेज ऑफ फिजिओथेरपी, जळगाव येथे जागतिक फिजिओथेरपी दिनानिमित्त विविध शैक्षणिक, क्रीडा, सर्जनशील व सामाजिक उपक्रमांनी फिजिओथेरपी सप्ताह उत्साहात साजरा करण्यात आला.

सप्ताहाचे उद्घाटन ३ सप्टेंबर रोजी करण्यात आले. यानिमित्त भुसावळ आरटीओ येथे फिटनेस कॅम्प व फिटनेस असेसमेंट आयोजित करून पोलिस कर्मचाऱ्यांच्या विविध फिटनेस चाचण्या घेण्यात आल्या तसेच त्यांना आरोग्यविषयक मार्गदर्शन करण्यात आले. या उपक्रमाचे समन्वयन डॉ. अमित जायस्वाल, डॉ. प्रियांका गुमनानी व डॉ. सचिन यांनी केले.

४ सप्टेंबर रोजी विद्यार्थ्यांसाठी नाविन्यपूर्ण क्विझ स्पर्धेचे आयोजन करण्यात आले. ‘अ‍ॅनाटॉमी अटॅक’, ‘बायोमेकॅनिक्स बॅटल’, ‘म्नेमोनिक मास्टर्स’, ‘लॉजिक लीग’ आणि ‘एंटरटेनमेंट एक्सप्रेस’ अशा विविध रंजक फेऱ्यांमधून विद्यार्थ्यांच्या ज्ञानाला व कल्पकतेला चालना देण्यात आली. या स्पर्धेचे समन्वयन डॉ. चित्रा, डॉ. दीक्षिता, डॉ. अनुराग, डॉ. वैष्णवी, डॉ. ऋतुजा व डॉ. सचिन यांनी केले.

५ सप्टेंबर रोजी 3D मॉडेल मेकिंग स्पर्धेने विद्यार्थ्यांच्या सर्जनशीलतेला व्यासपीठ मिळाले. फिजिओथेरपी व आरोग्यविषयक विविध संकल्पनांवर विद्यार्थ्यांनी आकर्षक त्रिमितीय मॉडेल सादर केले. या उपक्रमासाठी डॉ. अश्विनी, डॉ. रिया, डॉ. आशिष, डॉ. तेजल, डॉ. धृवी व डॉ. मनोज यांनी समन्वयक म्हणून कार्य केले.

७ सप्टेंबर रोजी ‘फिजिओ शार्क टँक २०२६’ या जाहिरात निर्मिती व नाविन्यपूर्ण सादरीकरण स्पर्धेचे आयोजन करण्यात आले. विद्यार्थ्यांनी फिजिओथेरपीशी संबंधित विविध संकल्पना प्रभावी जाहिरातींच्या माध्यमातून सादर करून आपल्या सर्जनशील विचारांची छाप पाडली. या स्पर्धेचे समन्वयन डॉ. पायल, डॉ. नेहा, डॉ. सेजल व डॉ. सोनिया यांनी केले.

सप्ताहाची सांगता वेबिनार व रक्तदान शिबिराने करण्यात आली. विद्यार्थी, शिक्षक व शिक्षकेतर कर्मचाऱ्यांनी उत्स्फूर्त सहभाग नोंदवत रक्तदान करून सामाजिक बांधिलकी जपली. या उपक्रमाचे समन्वयन डॉ. पवन, डॉ. वैष्णवी तसेच विद्यार्थी परिषद सदस्यांनी केले.

यावेळी पुरस्कार वितरण व सत्कार समारंभाचे आयोजन करण्यात आले. महाविद्यालयातील शिक्षक व शिक्षकेतर कर्मचाऱ्यांचा त्यांच्या उल्लेखनीय योगदानाबद्दल पुष्पगुच्छ व कौतुकपत्र देऊन गौरव करण्यात आला. फिजिओथेरपी सप्ताहातील विविध उपक्रमांमुळे विद्यार्थ्यांच्या ज्ञान, कौशल्य, सर्जनशीलता व सामाजिक जाणीवेचा सर्वांगीण विकास साधल्याची भावना यावेळी व्यक्त करण्यात आली.