शासकीय इतमामात वीर जवान लान्स नायक रोहित पाटील यांना अखेरचा निरोप पालकमंत्री गुलाबराव पाटील यांनी कुटुंबीयांचे केले सांत्वन; ‘शहीद जवान अमर रहे’च्या घोषणांनी कोळपिंप्री दुमदुमले

 

शासकीय इतमामात वीर जवान लान्स नायक रोहित पाटील यांना अखेरचा निरोप

पालकमंत्री गुलाबराव पाटील यांनी कुटुंबीयांचे केले सांत्वन; ‘शहीद जवान अमर रहे’च्या घोषणांनी कोळपिंप्री दुमदुमले

लेवाजगत न्यूज जळगाव, दि. ४ सप्टेंबर : पारोळा तालुक्यातील कोळपिंप्रीचे भूमिपुत्र आणि भारतीय सैन्य दलातील १ पॅरा (स्पेशल फोर्सेस) युनिटमध्ये कार्यरत लान्स नायक रोहित नारायण पाटील यांना शुक्रवारी साश्रुनयनांनी अखेरचा निरोप देण्यात आला. त्यांच्या पार्थिवावर कोळपिंप्री येथे शासकीय इतमामात अंत्यसंस्कार करण्यात आले. यावेळी भारतीय सैन्य दलाच्या जवानांनी मानवंदना देत वीर जवानाला अखेरची सलामी दिली.

लान्स नायक रोहित पाटील यांना १ सप्टेंबर २०२६ रोजी हरियाणा राज्यातील यमुनानगर येथील हथिनी कुंड बॅरेज परिसरात सैन्याच्या प्रत्यक्ष मोहिमेअंतर्गत सुरू असलेल्या युद्धाभ्यासादरम्यान वीरमरण आले. चिनूक हेलिकॉप्टरच्या सहाय्याने सुरू असलेल्या डायव्हिंग व हेलोकास्टिंग सरावात ते सहभागी झाले होते. पाण्याखालील डायव्हिंग व हेलोकास्टिंग प्रशिक्षणादरम्यान त्यांना वीरमरण आले.

शुक्रवारी दि. ४ सप्टेंबर रोजी सायंकाळी साडेपाचच्या सुमारास लष्करी वाहनातून त्यांचे पार्थिव कोळपिंप्री येथे आणण्यात आले. पार्थिव गावात दाखल होताच कुटुंबीय, नातेवाईक, ग्रामस्थ तसेच पंचक्रोशीतील नागरिकांनी अंत्यदर्शनासाठी मोठी गर्दी केली. भारतमातेच्या या वीर सुपुत्राला अखेरचा निरोप देताना उपस्थितांचे डोळे पाणावले होते. ‘शहीद जवान अमर रहे’, ‘भारत माता की जय’ अशा घोषणांनी परिसर दुमदुमून गेला.

यावेळी पालकमंत्री गुलाबराव पाटील यांनी लान्स नायक रोहित पाटील यांच्या पार्थिवावर पुष्पचक्र अर्पण करून श्रद्धांजली वाहिली. आमदार अनिल पाटील आणि जिल्हाधिकारी रोहन घुगे यांनीही पुष्पचक्र अर्पण केले. त्यानंतर पालकमंत्री पाटील यांनी शहीद जवानाच्या कुटुंबीयांची भेट घेऊन त्यांचे सांत्वन केले.

सायंकाळी सातच्या सुमारास शासकीय इतमामात अंत्यसंस्कार करण्यात आले. पारोळा पोलीस दलाच्या वतीने सलामी देण्यात आली. तसेच भारतीय सैन्य दलाच्या जवानांनी मानवंदना देत वीर जवानाला अखेरची सलामी दिली.

यावेळी जिल्हा सैनिक कल्याण अधिकारी मेजर निलेश पाटील, पारोळा तहसीलदार उल्हास देवरे, सैनिक कल्याण संघटक विश्वनाथ उगले, स्थानिक लोकप्रतिनिधी, जिल्हा सैनिक कल्याण कार्यालयाचे अधिकारी, प्रशासकीय अधिकारी, लष्करी व पोलीस अधिकारी, एनसीसीचे विद्यार्थी, सैनिक शाळेचे विद्यार्थी, ग्रामस्थ आणि पंचक्रोशीतील नागरिक मोठ्या संख्येने उपस्थित होते.

लान्स नायक रोहित पाटील यांच्या बलिदानामुळे कोळपिंप्रीसह संपूर्ण पारोळा तालुक्यावर शोककळा पसरली आहे. देशसेवेसाठी प्राणांचे सर्वोच्च बलिदान देणाऱ्या या वीर जवानाच्या शौर्याला आणि त्यागाला जिल्हावासीयांच्या वतीने भावपूर्ण अभिवादन करण्यात आले.