दीक्षारंभ कार्यक्रमांतर्गत कृषी विद्यार्थ्यांची जैन हिल्सला शैक्षणिक भेट आधुनिक कृषी तंत्रज्ञान, हायड्रोपोनिक्स व टिश्यू कल्चरची विद्यार्थ्यांनी घेतली प्रत्यक्ष माहिती

 

दीक्षारंभ कार्यक्रमांतर्गत कृषी विद्यार्थ्यांची जैन हिल्सला शैक्षणिक भेट

आधुनिक कृषी तंत्रज्ञान, हायड्रोपोनिक्स व टिश्यू कल्चरची विद्यार्थ्यांनी घेतली प्रत्यक्ष माहिती

लेवाजगत न्यूज जळगाव : गोदावरी फाउंडेशन संचालित डॉ. उल्हास पाटील कृषी महाविद्यालय, जळगाव येथील नवप्रवेशित विद्यार्थ्यांसाठी दीक्षारंभ कार्यक्रमांतर्गत जैन हिल्स, शिरसोली शिवार, जळगाव येथे शैक्षणिक भेटीचे आयोजन करण्यात आले. या भेटीच्या माध्यमातून विद्यार्थ्यांना आधुनिक कृषी तंत्रज्ञान, नाविन्यपूर्ण शेती पद्धती आणि कृषी क्षेत्रातील संशोधनात्मक उपक्रमांची प्रत्यक्ष माहिती मिळाली.

महाविद्यालयाचे प्राचार्य डॉ. शैलेश तायडे यांच्या मार्गदर्शनाखाली आणि दीक्षारंभ कार्यक्रमाचे समन्वयक प्रा. निलेश सदार यांच्या समन्वयातून या भेटीचे आयोजन करण्यात आले. यावेळी प्रा. वैभव पाटील आणि प्रा. सायली विधाते उपस्थित होते.

या शैक्षणिक भेटीदरम्यान विद्यार्थ्यांनी जैन हिल्स येथे राबविण्यात येणाऱ्या विविध कृषीविषयक उपक्रमांची माहिती जाणून घेतली. यामध्ये पीक प्रात्यक्षिके, ऊती संवर्धन (टिश्यू कल्चर), जलविरहित माध्यमातील शेती (हायड्रोपोनिक्स), हवेत लटकणाऱ्या मुळांच्या साहाय्याने केली जाणारी शेती (एरोपोनिक्स), मृदा आरोग्य व्यवस्थापन, एकात्मिक कीड व्यवस्थापन आणि शेतीचे यांत्रिकीकरण अशा महत्त्वपूर्ण विषयांचा समावेश होता.

आधुनिक तंत्रज्ञानाच्या साहाय्याने शेतीची उत्पादकता वाढविणे, पाणी व इतर नैसर्गिक संसाधनांचा कार्यक्षम वापर करणे आणि शाश्वत शेती पद्धतींचा अवलंब करणे याविषयी विद्यार्थ्यांना मार्गदर्शन मिळाले. कृषी क्षेत्रातील नवनवीन प्रयोग आणि संशोधनाची माहिती प्रत्यक्ष पाहण्याची संधी मिळाल्याने विद्यार्थ्यांना आधुनिक शेतीच्या विविध पैलूंची ओळख झाली.

कृषी शिक्षणामध्ये सैद्धांतिक ज्ञानासोबतच प्रत्यक्ष अनुभवाला विशेष महत्त्व आहे. अशा शैक्षणिक भेटींमुळे विद्यार्थ्यांना आधुनिक शेतीतील संधी, संशोधनाचे महत्त्व आणि कृषी विस्तार उपक्रमांची व्याप्ती समजण्यास मदत होते. तसेच भविष्यातील कृषी आव्हानांना सामोरे जाण्यासाठी आवश्यक असलेले व्यावहारिक ज्ञान आणि वैज्ञानिक दृष्टिकोन विकसित होण्यास हातभार लागतो.

नवप्रवेशित विद्यार्थ्यांना कृषी शिक्षणाची दिशा समजावून देणे, त्यांच्यामध्ये आधुनिक शेतीविषयी आवड निर्माण करणे आणि त्यांना व्यावसायिकदृष्ट्या सक्षम बनविणे हा दीक्षारंभ कार्यक्रमाचा प्रमुख उद्देश आहे. या शैक्षणिक भेटीमुळे विद्यार्थ्यांच्या कृषीविषयक ज्ञानात भर पडली असून त्यांच्या शैक्षणिक वाटचालीला नवी दिशा मिळाली.