आकाशवाणी जळगावचा ५१ वा वर्धापनदिन उत्साहात साजरा खानदेशच्या सांस्कृतिक, कृषी आणि सामाजिक विकासात आकाशवाणीचे मोलाचे योगदान

 

आकाशवाणी जळगावचा ५१ वा वर्धापनदिन उत्साहात साजरा

खानदेशच्या सांस्कृतिक, कृषी आणि सामाजिक विकासात आकाशवाणीचे मोलाचे योगदान

जळगाव लेवाजगत न्यूज प्रतिनिधी-

खानदेशच्या सांस्कृतिक, कृषी आणि सामाजिक जीवनाशी अतूट नाते जोडलेल्या आकाशवाणी जळगावचा ५१ वा वर्धापनदिन शुक्रवार, १६ ऑक्टोबर २०२६ रोजी उत्साहात साजरा करण्यात आला. १६ ऑक्टोबर १९७६ रोजी स्थापन झालेल्या या केंद्राने गेल्या पाच दशकांत माहिती, शिक्षण आणि मनोरंजनाच्या माध्यमातून खानदेशातील जनतेच्या मनात आपले विशेष स्थान निर्माण केले आहे.

‘बहुजन हिताय, बहुजन सुखाय’ हे ब्रीदवाक्य जपत आकाशवाणी जळगावने समाजप्रबोधनाची परंपरा अखंडितपणे सुरू ठेवली आहे. खानदेशातील सांस्कृतिक परंपरा, लोककला, लोकसंगीत, साहित्य आणि कृषी क्षेत्रातील विविध उपक्रमांना व्यासपीठ मिळवून देण्यात या केंद्राचे योगदान महत्त्वपूर्ण ठरले आहे.

शेतकऱ्यांना कृषिविषयक मार्गदर्शन, महिलांसाठी उपयुक्त कार्यक्रम, युवकांच्या कलागुणांना प्रोत्साहन तसेच विविध क्षेत्रांतील प्रतिभावंतांना आपली कला आणि विचार श्रोत्यांपर्यंत पोहोचविण्याची संधी आकाशवाणीने उपलब्ध करून दिली आहे. नैसर्गिक आपत्तीच्या काळात माहिती प्रसारित करणे, जनजागृती घडविणे आणि नागरिकांना मार्गदर्शन करणे, यामध्येही आकाशवाणीने मोलाची भूमिका बजावली आहे.

आकाशवाणी जळगावच्या माध्यमातून अनेक कलाकार, साहित्यिक, लोककलावंत, शेतकरी आणि नवोदित प्रतिभावंतांना आपली कला सादर करण्याची संधी मिळाली. बदलत्या तंत्रज्ञानाच्या युगातही विश्वासार्ह माहिती आणि लोकाभिमुख कार्यक्रमांची परंपरा जपत या केंद्राने आपले महत्त्व कायम राखले आहे.

केक कापून व आरोग्य शिबिराद्वारे वर्धापनदिन साजरा

वर्धापनदिनानिमित्त आकाशवाणीचे अभियांत्रिकी प्रमुख भारती नेमाडे, निवृत्त केंद्रप्रमुख सुधीर ओखदे, निवृत्त अकाउंटंट एन. एस. कुलकर्णी (नाना), जिल्हा अधीक्षक कृषी अधिकारी कुर्बान तडवी, केंद्रप्रमुख ज्ञानेश्वर बोबडे, कार्यक्रम प्रमुख विजय भुयार आणि आकाशवाणी जळगाव केंद्रातील नैमित्तिक उद्घोषक यांच्या उपस्थितीत केक कापून आनंद व्यक्त करण्यात आला.

याप्रसंगी डॉ. एन. एस. चौधरी यांच्या सहकार्याने आरोग्य शिबिराचे आयोजन करण्यात आले. या शिबिराचा अनेकांनी लाभ घेतला.

सध्या आकाशवाणी जळगाव येथे केंद्रप्रमुख तथा कार्यक्रम प्रमुख म्हणून ज्ञानेश्वर बोबडे, कार्यक्रम अधिकारी म्हणून विजय भुयार आणि वरिष्ठ उद्घोषक म्हणून नरेंद्र ठाकूर कार्यरत आहेत.

आकाशवाणी जळगावच्या ५१ व्या वर्धापनदिनानिमित्त रसिक श्रोते, कलाकार, शेतकरी, हितचिंतक आणि नागरिकांकडून शुभेच्छांचा वर्षाव करण्यात आला. खानदेशच्या जनजीवनाशी नाळ जोडणारे माहिती, शिक्षण आणि मनोरंजनाचे हे प्रभावी माध्यम भविष्यातही अधिक सक्षमपणे कार्यरत राहो, अशी अपेक्षा यावेळी व्यक्त करण्यात आली.