बलवाडी येथे छत्रपती शिवाजी महाराजांच्या अश्वारूढ पुतळ्याचे भूमिपूजन उत्साहात संपन्न रावेर तालुक्यात शिवमय वातावरण; आमदार नंदकिशोर महाजन यांच्या हस्ते भूमिपूजन, ऐतिहासिक स्मारकाच्या उभारणीला प्रारंभ

 

बलवाडी येथे छत्रपती शिवाजी महाराजांच्या अश्वारूढ पुतळ्याचे भूमिपूजन उत्साहात संपन्न

रावेर तालुक्यात शिवमय वातावरण; आमदार नंदकिशोर महाजन यांच्या हस्ते भूमिपूजन, ऐतिहासिक स्मारकाच्या उभारणीला प्रारंभ

सावदा | लेवा जगत न्यूज प्रतिनिधी

रावेर तालुक्यातील बलवाडी येथे हिंदवी स्वराज्याचे संस्थापक छत्रपती शिवाजी महाराज यांच्या अश्वारूढ पूर्णाकृती पुतळ्याच्या स्मारकाचे भूमिपूजन आमदार नंदकिशोर महाजन यांच्या हस्ते मोठ्या उत्साहात आणि शिवमय वातावरणात संपन्न झाले. या स्मारकाच्या उभारणीमुळे बलवाडी गावाच्या सांस्कृतिक आणि ऐतिहासिक वैभवात मोलाची भर पडणार असून, भावी पिढ्यांसाठी हे स्मारक प्रेरणास्थान ठरणार आहे.

छत्रपती शिवाजी महाराजांच्या स्मृती जपणारे आणि त्यांच्या विचारांची प्रेरणा देणारे हे स्मारक उभारले जात असल्याने परिसरातील शिवप्रेमी, ग्रामस्थ आणि नागरिकांमध्ये आनंदाचे वातावरण निर्माण झाले आहे. या उपक्रमासाठी पुढाकार घेणाऱ्या सर्व ग्रामस्थांचे, शिवप्रेमींचे तसेच सहकार्य करणाऱ्या नागरिकांचे आमदार नंदकिशोर महाजन यांनी अभिनंदन केले.

बलवाडी येथे उभारण्यात येणारा छत्रपती शिवाजी महाराजांचा अश्वारूढ पूर्णाकृती पुतळा हा केवळ स्मारक नसून महाराजांच्या अतुलनीय शौर्याचा, पराक्रमाचा, दूरदृष्टीचा आणि स्वराज्याच्या गौरवशाली इतिहासाचा प्रेरणादायी वारसा ठरणार आहे. महाराजांचे तेजस्वी व्यक्तिमत्त्व, रयतेप्रती असलेली बांधिलकी, न्यायप्रिय राज्यकारभार आणि स्वराज्य स्थापनेचे महान कार्य या स्मारकाच्या माध्यमातून नव्या पिढीसमोर कायमस्वरूपी अधोरेखित होणार आहे.

छत्रपती शिवाजी महाराजांचा इतिहास हा केवळ अभिमानाचा विषय नसून प्रत्येक पिढीसाठी प्रेरणेचा अखंड स्रोत आहे. त्यांच्या विचारांचा आणि कार्याचा आदर्श नव्या पिढीने आत्मसात करावा, समाजात राष्ट्रभक्ती, सामाजिक एकोपा आणि स्वाभिमानाची भावना अधिक दृढ व्हावी, या उद्देशाने या स्मारकाचे विशेष महत्त्व असल्याचे यावेळी अधोरेखित करण्यात आले.

भूमिपूजन सोहळ्याला परिसरातील शिवप्रेमी, ग्रामस्थ, विविध पदाधिकारी आणि नागरिक मोठ्या संख्येने उपस्थित होते. संपूर्ण परिसरात 'जय भवानी, जय शिवराय'च्या जयघोषाने उत्साहपूर्ण वातावरण निर्माण झाले होते. शिवरायांच्या अश्वारूढ पुतळ्याच्या उभारणीच्या दिशेने टाकलेले हे पहिले पाऊल बलवाडीकरांसाठी अभिमानाचा आणि आनंदाचा क्षण ठरले.