राष्ट्रीय नवोपक्रम २०२६ मध्ये जे.टी. महाजन अभियांत्रिकी महाविद्यालयाच्या EcruxBot संघाचे विजेतेपद फैजपूरच्या विद्यार्थ्यांची तंत्रज्ञान क्षेत्रात उल्लेखनीय कामगिरी; संस्थेकडून अभिनंदन

 

राष्ट्रीय नवोपक्रम २०२६ मध्ये जे.टी. महाजन अभियांत्रिकी महाविद्यालयाच्या EcruxBot संघाचे विजेतेपद

फैजपूरच्या विद्यार्थ्यांची तंत्रज्ञान क्षेत्रात उल्लेखनीय कामगिरी; संस्थेकडून अभिनंदन

फैजपूर (प्रतिनिधी) : नवकल्पना, तंत्रज्ञान आणि उद्योजकतेला प्रोत्साहन देण्यासाठी जळगाव येथे आयोजित ‘राष्ट्रीय नवोपक्रम २०२६’ या उपक्रमात फैजपूर येथील जे.टी. महाजन कॉलेज ऑफ इंजिनिअरिंगच्या EcruxBot संघाने विजेतेपद पटकावत उल्लेखनीय यश संपादन केले. या संघात महाविद्यालयाच्या तृतीय वर्षात शिक्षण घेणारे विद्यार्थी विरेंद्र वाल्हे यांचाही सहभाग होता.

या उपक्रमाचे उद्घाटन १६ ऑक्टोबर २०२६ रोजी सकाळी ११ वाजता जळगाव येथील सरदार वल्लभभाई पटेल भवनात मान्यवरांच्या उपस्थितीत झाले. यावेळी महाराष्ट्राचे वस्त्रोद्योग मंत्री संजय सावकारे, जळगावचे जिल्हाधिकारी रोहन घुगे, खासदार स्मिताताई वाघ, जळगाव शहराचे आमदार सुरेश दामू भोळे (राजू मामा), जिल्हा उद्योग केंद्राचे संतोष गावळी तसेच एमआयडीसीच्या प्रादेशिक अधिकारी दीपाली रासवे यांच्यासह विविध मान्यवर उपस्थित होते.

‘राष्ट्रीय नवोपक्रम २०२६’च्या माध्यमातून कृषी, आरोग्य, स्वच्छ ऊर्जा, कृत्रिम बुद्धिमत्ता, डिजिटल तंत्रज्ञान, शिक्षण, उद्योग, पर्यावरण आणि ग्रामीण विकास अशा विविध क्षेत्रांतील नाविन्यपूर्ण कल्पना व तंत्रज्ञानाधारित उपायांना व्यासपीठ उपलब्ध करून देण्यात आले. विद्यार्थ्यांना आणि नवउद्योजकांना आपल्या कल्पना सादर करण्याची तसेच त्यांचे प्रत्यक्ष प्रकल्पांमध्ये रूपांतर करण्याची संधी या उपक्रमातून मिळाली.

या स्पर्धेत EcruxBot संघाने विजेतेपद मिळवत आपल्या नाविन्यपूर्ण कार्याची छाप उमटवली. या यशामुळे संघातील विद्यार्थ्यांचा आत्मविश्वास वाढण्यासोबतच तंत्रज्ञानाच्या माध्यमातून नवनवीन समस्या सोडविण्याच्या त्यांच्या प्रयत्नांना प्रोत्साहन मिळाले आहे. विद्यार्थ्यांच्या सर्जनशीलतेला आणि संशोधनवृत्तीला चालना देणारे हे यश इतर विद्यार्थ्यांसाठीही प्रेरणादायी ठरणार आहे.

या उल्लेखनीय यशाबद्दल संस्थेचे अध्यक्ष शरद दादा महाजन, उपाध्यक्ष उल्हास चौधरी, सचिव व्ही. आर. झोपे, सहसचिव शशिकांत चौधरी, महाविद्यालयाचे प्राचार्य डॉ. के. जी. पाटील, उपप्राचार्य डॉ. जी. ई. चौधरी, सर्व विभागप्रमुख, शिक्षक व शिक्षकेतर कर्मचाऱ्यांनी EcruxBot संघाचे अभिनंदन केले.

जे.टी. महाजन कॉलेज ऑफ इंजिनिअरिंगच्या या यशामुळे फैजपूरच्या शैक्षणिक क्षेत्राच्या शिरपेचात मानाचा तुरा रोवला गेला आहे.