उधारीवर पान-सिगारेट न दिल्याने पानटपरी व्यावसायिकावर कोयता व तलवारीने प्राणघातक हल्ला; एमआयडीसी पोलिसांची धडक कारवाई, तीन संशयित अटकेत

जळगाव | लेवाजगत न्यूज-

जळगाव शहरातील एमआयडीसी पोलीस ठाण्याच्या हद्दीत गोदावरी इंजिनिअरिंग कॉलेजजवळ उधारीवर पान-सिगारेट देण्यास नकार दिल्याच्या कारणावरून पानटपरी व्यावसायिकावर धारदार कोयता आणि तलवारीने प्राणघातक हल्ला केल्याची गंभीर घटना घडली आहे. या हल्ल्यात किशोर माधवराव बाविस्कर (वय ४१, रा. शिवनगर, खेडी बुद्रुक, जळगाव) हे जखमी झाले आहेत. या घटनेनंतर एमआयडीसी पोलिसांनी तातडीने तपासाची चक्रे फिरवत अवघ्या काही तासांत तीन संशयित आरोपींना अटक केली असून, एका विधिसंघर्षित बालकालाही ताब्यात घेतले आहे.

मिळालेल्या माहितीनुसार, किशोर बाविस्कर हे भंगार व्यवसायासह पानटपरी चालवतात. २३ ऑक्टोबर २०२६ रोजी सकाळी सुमारे आठ वाजण्याच्या सुमारास काही जण त्यांच्या पानटपरीवर आले. त्यांनी उधारीवर पान-सिगारेट देण्याची मागणी केली. मात्र, बाविस्कर यांनी उधारीवर वस्तू देण्यास नकार दिल्याने संबंधित आरोपी संतप्त झाले. त्यानंतर त्यांनी बाविस्कर यांना शिवीगाळ करत, “तुम्हा दोन्ही भावांना जिवंत सोडणार नाही,” अशी धमकी दिल्याचे फिर्यादीत नमूद आहे.

वादाचे रूपांतर पुढे मारहाणीत झाले. संशयितांनी किशोर बाविस्कर यांना लाथाबुक्क्यांनी मारहाण केली. याचदरम्यान आनंद हरी पाटील याने धारदार कोयत्याने, तर हर्षल रवींद्र शिंदे याने हातातील तलवारीने त्यांच्यावर प्राणघातक हल्ला केल्याचा आरोप आहे. हल्ल्यानंतर संशयित घटनास्थळावरून पसार झाले. अचानक घडलेल्या या प्रकारामुळे परिसरात खळबळ उडाली.

हल्ल्यात जखमी झालेल्या किशोर बाविस्कर यांना उपचारासाठी जळगाव येथील सिव्हिल रुग्णालयात दाखल करण्यात आले. उपचार सुरू असताना त्यांनी दिलेल्या जबाबाच्या आधारे एमआयडीसी पोलीस ठाण्यात गुन्हा दाखल करण्यात आला. घटनेचे गांभीर्य लक्षात घेऊन पोलिसांनी तातडीने तपास सुरू केला. तपासादरम्यान पोलिसांनी अवघ्या काही तासांत तीन संशयित आरोपींना अटक केली, तर एका विधिसंघर्षित बालकाला ताब्यात घेतले.

उधारीवर पान-सिगारेट देण्याच्या किरकोळ कारणावरून धारदार शस्त्रांचा वापर करून झालेल्या या हल्ल्यामुळे परिसरात चर्चेला उधाण आले आहे. या प्रकरणाचा पुढील तपास एमआयडीसी पोलीस करीत असून, घटनेमागील अन्य तपशील आणि पोलिसांच्या पुढील कारवाईकडे लक्ष लागले आहे.

लेवाजगत न्यूज | जळगाव