जागतिक संधिवात दिनानिमित्त डॉ. उल्हास पाटील कॉलेज ऑफ फिजिओथेरपीत व्यायाम सत्र

लेवाजगत न्यूज जळगाव : जागतिक संधिवात दिनानिमित्त डॉ. उल्हास पाटील कॉलेज ऑफ फिजिओथेरपी, जळगाव येथील मस्क्युलोस्केलेटल फिजिओथेरपी विभागातर्फे १२ ऑक्टोबर रोजी विशेष व्यायाम सत्राचे आयोजन करण्यात आले. डॉ. उल्हास पाटील रुग्णालयातील फिजिओथेरपी ओपीडीमध्ये आयोजित या सत्रात १० प्रौढ व्यक्तींनी सहभाग घेतला.

या व्यायाम सत्राचे संचालन डॉ. सोनिया बेनाङे, डॉ. तेजल सोनवणे आणि डॉ. सेजल कुकरेजा यांनी केले. यावेळी सहभागी व्यक्तींना फिजिओथेरपिस्टच्या मार्गदर्शनाखाली विविध उपचारात्मक व्यायाम शिकविण्यात आले.

संधिवाताच्या व्यवस्थापनामध्ये नियमित शारीरिक हालचाल आणि उपचारात्मक व्यायामाचे महत्त्व पटवून देणे हा या उपक्रमाचा मुख्य उद्देश होता. सांध्यांमधील वेदना व आखडलेपणा कमी करणे, सांध्यांची हालचाल सुधारण्यास मदत करणे आणि दैनंदिन कामांमध्ये स्वावलंबन टिकवून ठेवण्यासाठी आवश्यक मार्गदर्शन करण्यात आले.

यावेळी निरोगी जीवनशैली, नियमित व्यायाम, पडणे टाळण्यासाठी घ्यावयाची खबरदारी आणि वेळोवेळी आरोग्य तपासणी करण्याचे महत्त्वही समजावून सांगण्यात आले. तसेच सुरक्षित व्यायाम पद्धती आणि जीवनमान सुधारण्यासाठी आवश्यक फिजिओथेरपीविषयक सूचना देण्यात आल्या.

या उपक्रमाच्या माध्यमातून सांध्यांचे आरोग्य जपणे, शारीरिक कार्यक्षमता टिकवून ठेवणे आणि संधिवातग्रस्त व्यक्तींना सक्रिय व स्वावलंबी जीवन जगण्यासाठी प्रोत्साहित करणे यामध्ये फिजिओथेरपीची महत्त्वपूर्ण भूमिका अधोरेखित करण्यात आली.

कार्यक्रमाच्या यशस्वितेसाठी सहभागी व्यक्ती, प्राध्यापकवर्ग आणि सहकार्य करणाऱ्या सर्वांचे विभागातर्फे आभार व्यक्त करण्यात आले.