कोरोना काळातील कार्याचा आढावा घेण्यासाठी माजी पोलीस निरीक्षक अरुण धनवडे यांची यावल पोलीस ठाण्याला भेट

माजी पोलीस निरीक्षक अरुण धनवडे यांची यावल पोलीस ठाण्याला भेट; वृक्षारोपण व बोअरवेलची केली पाहणी

लेवाजगत न्यूज प्रतिनिधी सुनील मेघे यावल : कोरोना महामारीच्या काळात स्वतःच्या जीवाची पर्वा न करता यावल तालुक्यातील नागरिकांच्या सुरक्षिततेसाठी कार्य करणारे माजी पोलीस निरीक्षक अरुण धनवडे यांनी यावल पोलीस ठाण्याला भेट दिली. यावेळी त्यांनी आपल्या कार्यकाळात लावलेल्या वृक्षांची तसेच तयार केलेल्या बोअरवेलची पाहणी केली.

कोरोना महामारीच्या कठीण काळात नागरिकांच्या सुरक्षिततेसाठी आणि कायदा-सुव्यवस्था राखण्यासाठी पोलीस प्रशासनाने महत्त्वाची भूमिका बजावली होती. या काळात पोलीस निरीक्षक अरुण धनवडे यांनी कर्तव्य बजावताना सामाजिक उपक्रमांनाही महत्त्व दिले होते. त्यांच्या कार्यकाळात लावण्यात आलेल्या वृक्षांची सद्यस्थिती आणि करण्यात आलेल्या बोअरवेलची पाहणी त्यांनी यावेळी केली.

यावेळी पोलीस निरीक्षक रंगनाथ धारबळे, पोलीस उपनिरीक्षक (PSI) मुजफर, समादेशक अधिकारी विजय जावरे, शांतता समितीचे सदस्य विजय सराफ यांच्यासह इतर पोलीस कर्मचारी, होमगार्ड आणि ज्येष्ठ नागरिक उपस्थित होते.

या भेटीदरम्यान कोरोना काळातील कार्याचा आढावा घेत जुन्या आठवणींना उजाळा मिळाला. वृक्षारोपण आणि पाण्याची उपलब्धता यांसारख्या उपक्रमांची पाहणी केल्याने पर्यावरण संवर्धन व पाणी व्यवस्थापनाच्या कामांचे महत्त्वही अधोरेखित झाले.