नववधूला अटक- तरुणाशी लग्न करून पैसे घेवून पसार झाली होती

नववधूला अटक-

 तरुणाशी लग्न करून पैसे घेवून पसार झाली होती.

यावल पोलिसात गुन्हा : किनगाव येथील तरुणाची फसवणूक

लेवाजगत न्यूज यावल- तालुक्यातील किनगाव येथील तरुणाकडून पैसे घेत लग्न करून झालेल्या नववधूला यावल पोलिसांनी अटक केली आहे. तिला शनिवारी ५ फेब्रुवारी रोजी दुपारी यावल न्यायालयात हजर केले असता न्या. एस. एम. बनचरे यांनी ८ फेब्रुवारीपर्यंत पोलीस कोठडी सुनावली आहे.

तालुक्यातील किनगाव येथील रहिवासी धनंजय हिरालाल सोनार या तरुणाचा यशवंत उर्फ दादू विजय पाटील रा. सांगली खुर्द यांची मानलेली बहीण सरिता प्रकाश कोळी रा. अंजाळे हिच्यासोबत विवाह निश्चित झाला होता.

या विवाहासाठी सव्वा लाख रुपये द्यावे तसेच लग्नाचा खर्च मुलाने करावा असे ठरवण्यात आले होते. त्याप्रमाणे ८५ हजार रुपयांची रोकड देण्यात आली होती, उर्वरित रक्कम नंतर देणार होते.

यानुसार १४ डिसेंबर २०२१ रोजी देहू आळंदी पुणे येथील अलंकापुरी मंगल कार्यालय पुणे येथे लग्न देखील पार पडले. लग्नाच्या सात दिवसानंतर यशवंत उर्फ दादू विजय पाटील किनगाव येथे आला व नववधू सरिता कोळी हिस तिच्या आईच्या भेटीसाठी मी घेऊन जात आहे, असे सांगून घेऊन गेला व परत आलाच नाही. सर्वत्र शोधाशोध करून देखील नववधू आणि तिचा मानलेला भाऊ मिळून न आल्यामुळे आपली फसवणूक झाल्याचे सोनार यांच्या लक्षात आले.

     यानंतर सोनार यांनी यावल पोलीस ठाण्यात धाव घेत तक्रार दिली. त्यांच्या तक्रारीवरून शुक्रवारी ४ फेब्रुवारी रोजी यावल पोलिसात त्या दोघांवर गुन्हा दाखल करण्यात आला होता. तपास करीत संशयित आरोपी नववधू सरिता हिला पोलिसांनी अटक केली आहे. पुढील तपास पोलीस निरीक्षक सुधीर पाटील यांच्या मार्गदर्शनाखाली पोलीस उपनिरीक्षक जितेंद्र खैरनार करीत आहे.