ओबीसींच्या आरक्षणाशिवाय निवडणूक नको, खंबीर पावलं उचला, पंकजा मुंडेंसह धनंजय मुंडेंची ठाम भूमिका

लेवाजगत न्युज:-राज्य निवडणूक आयोगानं राज्यातील १७ जिल्ह्यातील ९२ नगरपालिका आणि ४ नगरपंचायतींचा निवडणूक कार्यक्रम जाहीर केला आहे. 

 राज्यातील विरोधी पक्षांकडून ओबीसी राजकीय आरक्षणाशिवाय निवडणूक घेण्यात येऊ नये, अशी भूमिका मांडलीय.

राज्य निवडणूक आयोगाने नुकत्याच राज्यातील ९२ नगरपालिका व ४ नगरपंचायतीच्या निवडणुकांचा कार्यक्रम जाहीर केला आहे. सुप्रीम कोर्टाच्या आदेशाप्रमाणं राज्य निवडणूक आयोगानं कमी पाऊस असलेल्या ठिकाणी स्थानिक स्वराज्य संस्थांच्या निवडणुका जाहीर केल्या आहेत. या निवडणुका ओबीसी राजकीय आरक्षणावर निर्णय झाल्याशिवाय होऊ नयेत, अशी भूमिका राज्याचे माजी सामाजिक न्याय मंत्री धनंजय मुंडे आणि भाजप नेत्या पंकजा मुंडे यांनी मांडली आहे. ओबीसी राजकीय आरक्षणाच्या मुद्यावर धनंजय मुंडे आणि पंकजा मुंडे यांनी एकसारखी भूमिका घेतलीय.

धनंजय मुंडे यांनी यासंदर्भात एक ट्विट केले असून यात, ओबीसी आरक्षणा संदर्भात महाविकास आघाडी सरकारने नेमलेल्या आयोगाचा अहवाल तयार आहे, त्यामुळे राज्यातील जाहीर ९२ नगर परिषदांच्या निवडणुका ओबीसी आरक्षण जाहीर झाल्याशिवाय होऊ नयेत, अशी आमची ठाम भूमिका आहे.

  नवीन सरकारने तातडीने याबाबत कार्यवाही केली पाहिजे, अशी भूमिका धनंजय मुंडे यांनी मांडली आहे.

नव्या सरकारनं खंबीर पावलं उचलावी : पंकजाताई मुंडे

दुसरीकडे पंकजा मुंडे यांनी देखील यावर ट्विट करत त्यांनी म्हटलं आहे की,"काही ठिकाणी नगरपालिका निवडणुका जाहीर झाल्या आहेत. नवनिर्वाचित मुख्यमंत्री आणि उपमुख्यमंत्री यांनी या गोष्टीची दखल घ्यावी. ओबीसी आरक्षण देऊनच निवडणुका होतील, अशी खंबीर पावलं उचलावी. सरकारकडून न्याय मिळेल हा विश्वास आहे", असं पंकजा मुंडे म्हणाल्या.

पंकजा मुंडे आणि धनंजय मुंडे यांनी ट्विट करत ओबीसी राजकीय आरक्षणाबाबत भूमिका जाहीर केली आहे. नगरपालिका आणि नगरपंचायत निवडणुकीत ओबीसी राजकीय आरक्षण मिळणार का हे पाहणं आवश्यक आहे.