बाईक भिंतीवर धडकल्याने मामे भाऊ व आते भाऊ चा दुर्देवी मृत्यू
बाईक भिंतीवर धडकल्याने मामे भाऊ व आते भाऊ चा दुर्देवी मृत्यू
लेवाजगत न्यूज वरणगाव -भरधाव दुचाकी बोहर्डी (ता.भुसावळ) लगतच्या उड्डाणपुलाच्या भिंतीला धडकल्याने मामेभाऊ व आतेभावाचा दुर्देवी मृत्यू झाला. सूरज रामदास तांबे (वय १५, रा.काहुरखेडे) आणि सुनील विठ्ठल भालेराव (वय २०, रा.वाघारी, ता.जामनेर) अशी मृतांची नावे आहेत. यापैकी सूरज याच्या मोठ्या भावाचे सोमवारी वर्षश्राद्ध होते. याच दिवशी कुटुंबीयांना दुसरा मुलगा गमवावा लागला.
रामदास तांबे यांचा मोठा मुलगा गोविंदा याचा गेल्या वर्षी अकस्मात मृत्यू झाला होता. त्याच्या वर्षश्राद्धासाठी सोमवारी तांबे यांच्या घरी काहुरखेडे येथे छोटेखानी कार्यक्रम होता. हा कार्यक्रम आटोपल्यानंतर रामदास तांबे यांचा मुलगा सूरज तांबे (वय १५, रा.काहुरखेडे) आणि भाचा सुनील विठ्ठल भालेराव (वय २०, रा.वाघारी ता.जामनेर) हे दोघे मामेभाऊ व आतेभाऊ काहुरखेडे येथून बोहर्डीकडे दुचाकीने जात होते.
दुपारी ३.३० वाजेच्या सुमारास बोहर्डीजवळ त्यांची अनियंत्रित झालेली दुचाकी उड्डाणपुलाच्या भिंतीला धडकली. त्यात सूरज तांबे याचा जागीच मृत्यू झाला. तरसुनील भालेराव हा गंभीर जखमी झाला. त्याला जळगाव येथील जिल्हा रुग्णालयात नेण्यात आले. पण, उपचारादरम्यान मृत्यू झाला. मृत सूरज याचे शवविच्छेदन वरणगाव ग्रामीण रुग्णालयात डॉ. क्षीतिजा हेंडवे यांनी केले. रात्री उशिराने अंत्यसंस्कार झाले.
कोणत्याही टिप्पण्या नाहीत