शरद पवार दोन दिवस जिल्हा दौऱ्यावर येणार १५ रोजी आगमन, पक्षाचा विस्तृत आढावा घेणार

 

शरद पवार दोन दिवस जिल्हा दौऱ्यावर येणार १५ रोजी आगमन, पक्षाचा विस्तृत आढावा घेणार 

 लेवाजगत न्यूज जळगाव- राष्ट्रवादी काँग्रेस पक्षाच्या ग्रंथालय सेलच्या राज्यस्तरीय अधिवेशनाच्या निमित्ताने राष्ट्रीय अध्यक्ष खासदार शरद पवार हे १५ व १६ जून रोजी दोन दिवस जळगाव जिल्हा दौऱ्यावर येत आहेत. कार्यक्रमाला राज्याचे विरोधी पक्षनेता अजित पवार व राष्ट्रवादीचे प्रदेशाध्यक्ष जयंत पाटील हे देखील उपस्थित राहणार आहेत. या निमित्ताने १४ रोजी नियोजनासाठी जिल्हा व महानगराची बैठक आयोजित करण्यात आली आहे. 

शरद पवार यांना ठार मारण्याची धमकी आल्यानंतर खळबळ  उडाली आहे. राष्ट्रवादीच्या कार्याध्यक्षपदी खासदार सुप्रिया सुळे व प्रफुल्ल पटेल यांच्या नावाची घोषणा झाल्यानंतर राष्ट्रवादी राज्यभरात चर्चेचा विषय ठरला आहे. दरम्यान, खासदार पवार हे जिल्हा दौऱ्यावर येत असल्याने पदाधिकारी व कार्यकर्त्यांमध्ये चैतन्याचे वातावरण निर्माण झाले आहे. शरद पवार हे १५ जून रोजी रात्री ८.५० वाजता राजधानी एक्स्प्रेसने जळगावात दाखल होतील. त्यानंतर जैन हिल्स  येथे रात्री मुक्काम होईल. १६ रोजी सकाळी ८ वाजता अमळनेर येथे आयोजित राष्ट्रवादी काँग्रेसच्या ग्रंथालय सेलच्या अधिवेशनासाठी रवाना होतील. सकाळी ११ ते १२.३० वाजेपर्यंत अधिवेशनात हजेरी लावल्यानंतर ग्रंथालय सेलचे प्रदेशाध्यक्ष उमेश पाटील यांच्या निवासस्थानी भेट देतील. दुपारी २ अमळनेर येथून जळगावकडे रवाना होतील. तसेच दुपारी ४ वाजता जिल्हाध्यक्ष अॅड. रवींद्र पाटील यांच्या निवासस्थानी भेट देतील. त्यानंतर रात्री ११.३० वाजता अमरावती एक्स्प्रेसने रवाना होणार आहेत. |