आकाशातून १६ किलोचा रहस्यमय धातूचा तुकडा पंडला! जळगावात खळबळ

 

आकाशातून १६ किलोचा रहस्यमय धातूचा तुकडा पंडला! जळगावात खळबळ

लेवाजगत न्यूज, जळगाव –जळगावच्या एमआयडीसी परिसरात गुरुवारी रात्री एक अनोखी आणि धक्कादायक घटना घडली. आकाशातून तब्बल १६ किलो वजनाचा धातूचा तुकडा अचानक जमिनीवर कोसळला. या प्रकारामुळे परिसरात भीती आणि उत्सुकता यांचं वातावरण निर्माण झालं असून, नागरिकांमध्ये तीव्र चर्चा रंगली आहे.

हा धातूचा तुकडा नेमका कुठून आला आणि तो नक्की कोणत्या धातूचा आहे, याबाबत सध्या कोणतीही ठोस माहिती उपलब्ध नाही. मात्र, ही खगोलशास्त्रीय घटना आहे की काही वेगळा प्रकार, यावरून तर्कवितर्क सुरू झाले आहेत.

घटनेची माहिती मिळताच प्रांताधिकारी विनय गोसावी आणि एमआयडीसी पोलीस ठाण्याचे निरीक्षक बबन आव्हाड यांच्यासह वरिष्ठ अधिकारी तातडीने घटनास्थळी दाखल झाले. त्यांनी त्या धातूच्या तुकड्याची पाहणी केली आणि तो पोलिसांकडून ताब्यात घेण्यात आला आहे.

पोलिसांकडून अधिकृत माहिती:
"हा तुकडा नेमका कुठून आला, याचा शोध घेण्यासाठी भूवैज्ञानिक व इतर तज्ज्ञांची मदत घेण्यात येणार आहे. त्यानंतरच यामागील सत्य स्पष्ट होईल," अशी माहिती निरीक्षक बबन आव्हाड यांनी दिली.

सध्या काय घडतेय?

• तुकडा पोलिसांच्या ताब्यात
• वैज्ञानिक तपासणीसाठी तयारी सुरू
• नागरिकांमध्ये भीती आणि कुतूहल
• उल्कापात की काही वेगळे? – चर्चेला उधाण

हा प्रकार उल्कापाताचा परिणाम असू शकतो, अशी प्राथमिक शक्यता वर्तवली जात आहे. मात्र, तपासानंतरच खरे कारण स्पष्ट होईल.

 पुढील तपासणी अहवालाची प्रतीक्षा सुरु असून, जळगाव शहर यावर लक्ष ठेवून आहे.

ही घटना भविष्यातील खगोल अभ्यासासाठी महत्त्वाची ठरू शकते, असे जाणकारांचे मत आहे.