दामिनी पवन सराफ यांच्या प्रचारार्थ भव्य रॅली :- अमोल जावळे यांच्या नेतृत्वाखाली उत्स्फूर्त प्रतिसाद

फैजपूर (प्रतिनिधी) : फैजपूर नगरपरिषद निवडणुकीत भाजपा–शिवसेना युतीच्या नगराध्यक्ष पदाच्या अधिकृत उमेदवार दामिनी पवन सराफ यांच्या प्रचारार्थ आज भव्य व भव्यदिव्य अशी प्रचार रॅली उत्साहात पार पडली. या रॅलीचे नेतृत्व रावेर मतदारसंघाचे आमदार अमोल जावळे यांनी केले.

या प्रचार रॅलीत नागरिकांचा उस्फूर्त सहभाग पाहायला मिळाला. जनतेचा मिळालेला जबरदस्त प्रतिसाद पाहता दामिनी सराफ यांचा विजय निश्चित असल्याचे चित्र स्पष्ट दिसत आहे. मतदारांचा पाठिंबा हाच त्यांच्या विजयाचा मार्ग मोठ्या प्रमाणात सुकर करत असल्याचे चर्चेत दिसून आले.

रॅलीच्या प्रारंभी खंडोबा देवस्थान येथे दामिनी सराफ व पवन सराफ यांनी आमदार अमोल जावळे यांच्या उपस्थितीत पूजा-अर्चा केली. त्यानंतर या रॅलीला सुरुवात होऊन ती फैजपूर शहरातील प्रत्येक प्रभागातून मार्गक्रमण करत जनतेला ‘कमळ’ चिन्हावर मतदान करण्याचे आवाहन करण्यात आले. ढोल-ताशे, घोषणाबाजी आणि उत्साहाच्या वातावरणात रॅलीने शहरातील जनतेचे लक्ष वेधून घेतले.

या भव्य प्रचार रॅलीत माजी नगरसेवक, माजी नगराध्यक्ष, माजी उपनगराध्यक्ष, विविध सामाजिक संस्थांचे पदाधिकारी, भाजपा-शिवसेना युतीचे नगरसेवक पदाचे उमेदवार, महिला कार्यकर्त्या, युवक व ज्येष्ठ नागरिक मोठ्या संख्येने सहभागी झाले.

यावेळी आमदार अमोल जावळे यांनी आवाहन केले की,

 "फैजपूरच्या सर्वांगीण विकासासाठी भारतीय जनता पार्टीने दिलेल्या उमेदवार दामिनी पवन सराफ यांना बहुमताने विजयी करा व शहराच्या विकासासाठी हातभार लावा."