सावदा नगरपालिका निवडणूक : प्रभाग क्रमांक ४ ‘ब’ मध्ये निवडणूक स्थगितीच्या चर्चेने शहरात खळबळ

लेवाजगत न्यूज सावदा (प्रतिनिधी):

निवडणूक आयोगाच्या सूचनेवरून सावदा नगरपालिका निवडणूक २०२५ मधील प्रभाग क्रमांक ४ ‘ब’ मध्ये निवडणूक स्थगित करण्यात आल्याचे एक पत्रक आले असल्याची जोरदार चर्चा शहरात सुरू असून, या संदर्भात अधिकृतरीत्या कोणतीही घोषणा निवडणूक विभागाकडून जाहीर झालेली नाही, अशी प्राथमिक माहिती उपलब्ध होत आहे.

प्रचार मोहीम शिगेला पोहोचत असताना अचानक या पत्रकामुळे मतदार आणि उमेदवार दोघेही संभ्रमात आले आहेत. या प्रभागातून राष्ट्रवादी काँग्रेस आणि भाजप या पक्षांचे उमेदवार निवडणुकीत उतरले असून दोन्ही पक्षांचा प्रचार जोमात सुरू होता.

दरम्यान, या प्रभागात निवडणूक निर्णय अधिकारी विरुद्ध कोर्टात दावा दाखल झाल्याने निवडणूक स्थगितीची शक्यता निर्माण झाल्याची चर्चा देखील जोर धरत आहे. मात्र याबाबत अद्याप अधिकृत माहिती स्पष्टपणे समोर आलेली नाही, त्यामुळे परिस्थिती अधिकच गुंतागुंतीची झाली आहे.

या चर्चेमुळे गावात राजकीय वातावरण तापले असून ही बाब निवडणुकीतील मुख्य चर्चेचा मुद्दा ठरली आहे.

स्थानिक नागरिकांनी निवडणूक आयोग आणि प्रशासनाने त्वरित अधिकृत भूमिका जाहीर करावी, अशी मागणी केली आहे.

सदर प्रकरणाबाबत लवकरच औपचारिक निर्णय जाहीर होण्याची शक्यता व्यक्त केली जात आहे.