सौदीतील भीषण अपघातात ४२ भारतीयांचा मृत्यू

सौदीतील भीषण अपघातात ४२ भारतीयांचा मृत्यू

मदीना (सौदी अरेबिया)/हैदराबाद │ प्रतिनिधी

सौदी अरेबियातील मदिना शहराजवळ रविवारी मध्यरात्री झालेल्या भीषण बस-ऑइल टँकर अपघातात किमान ४४ जणांचा मृत्यू झाला असून, त्यापैकी ४२ जण तेलंगणातील असल्याची माहिती अधिकाऱ्यांनी दिली. या दुर्घटनेत एक भाविक जखमी असून त्याच्यावर उपचार सुरू आहेत.

उमराहहून मदीनाकडे जाताना अपघात

हैदराबाद येथून ५४ उमराह भाविक ९ नोव्हेंबर रोजी जेद्दाहला रवाना झाले होते. २३ नोव्हेंबरला परतण्याची त्यांची योजना होती. रविवारी यापैकी ४४ जण बसने मक्केवरून मदीनाकडे जात होते. मदिनापासून ४० किमी अंतरावर बस रस्त्याच्या कडेला उभी असताना, स्थानिक वेळेनुसार रात्री ११ वाजता एका ऑइल टँकरने बसला जोरदार धडक दिली. धडकेनंतर बसने पेट घेतला आणि ४२ भाविकांसह २ स्थानिक नागरिकांचा मृत्यू झाला.

तातडीची मदत — भारतीय दूतावासाची कंट्रोल रूम

अपघाताची माहिती मिळताच जेद्दाहमधील भारतीय दूतावासातील अधिकारी घटनास्थळी रवाना झाले. दूतावासाने “कंट्रोल रूम” सुरू करून स्थानिक प्रशासनाशी समन्वय साधला आहे. सौदी हज व उमराह मंत्रालयाशीही संपर्क ठेवण्यात आला आहे.

नेत्यांची प्रतिक्रिया

• पंतप्रधान नरेंद्र मोदी यांनी तीव्र शोक व्यक्त करत, मृतांच्या कुटुंबीयांना सांत्वन दिले.
• परराष्ट्रमंत्री एस. जयशंकर यांनी घटना हृदयद्रावक असल्याचे सांगत तातडीने मदतसूचना दिल्या.
• काँग्रेस अध्यक्ष मल्लिकार्जुन खरगे यांनी जखमींच्या प्रकृतीसाठी प्रार्थना केली.
• तेलंगणाचे मुख्यमंत्री रेवंथ रेड्डी यांनी पीडित कुटुंबांना सर्वतोपरी मदत करण्याचे निर्देश दिले.

तेलंगण सरकारचे पथक सौदीकडे

तेलंगण सरकारने अल्पसंख्याक कल्याणमंत्री मोहम्मद अझरुद्दीन यांच्या नेतृत्वाखाली एक विशेष पथक सौदीला रवाना करण्याचा निर्णय घेतला आहे. पीडितांच्या कुटुंबातील प्रत्येकी दोन जणांना सौदीत नेण्यात येणार आहे. अपघातात मृत्यू पावलेल्यांचे अंत्यसंस्कार सौदीतच करण्यात येणार असल्याची माहिती देण्यात आली.