चिनावलच्या आरती बोरोले यांना ‘मिसेस महाराष्ट्र २०२५’चा मानाचा खिताब पुण्यातील प्रतिष्ठित स्पर्धेत सिल्वर श्रेणीत प्रथम क्रमांक

 

चिनावलच्या आरती बोरोले यांना ‘मिसेस महाराष्ट्र २०२५’चा मानाचा खिताब

पुण्यातील प्रतिष्ठित स्पर्धेत सिल्वर श्रेणीत प्रथम क्रमांक

 लेवाजगत न्यूज चिनावल:-

चिनावल येथील मूळ रहिवासी असलेल्या आरती तुषार बोरोले यांनी नुकताच पुणे येथील हॉटेल हयात येथे पार पडलेल्या प्रतिष्ठित मिसेस महाराष्ट्र २०२५ स्पर्धेत सिल्वर श्रेणीत प्रथम क्रमांक पटकावत मिसेस महाराष्ट्र २०२५ चा मानाचा खिताब पटकावला आहे. त्यांच्या या उल्लेखनीय यशामुळे चिनावलसह संपूर्ण परिसरात आनंदाचे वातावरण निर्माण झाले आहे.

ही स्पर्धा दिवा पेजंट्स या आंतरराष्ट्रीय स्तरावरील व्यासपीठातर्फे आयोजित करण्यात आली होती. दिवा पेजंट्सची स्थापना २०१४ मध्ये मॅनेजिंग डायरेक्टर अंजना मास्करेनहास आणि मार्केटिंग डायरेक्टर कार्ल मास्करेनहास यांनी केली असून, हे व्यासपीठ सौंदर्याबरोबरच आत्मविश्वास, व्यक्तिमत्त्व विकास आणि महिला सक्षमीकरणाला प्रोत्साहन देते.

या स्पर्धेत राज्यभरातून ४६ हून अधिक फायनलिस्ट्स सहभागी झाल्या होत्या. स्पर्धेदरम्यान फॅशन, प्रतिभा, संवाद कौशल्य आणि महिला सक्षमीकरणाशी संबंधित विविध फेऱ्यांमध्ये स्पर्धकांनी आपली कला सादर केली. आरती बोरोले यांनी सिल्वर श्रेणीत उत्कृष्ट कामगिरी करत परीक्षकांची मने जिंकली आणि मिसेस महाराष्ट्र २०२५ हा किताब मिळवला.

मुख्य मुकुटासह आरती बोरोले यांनी ‘मिसेस अचिव्हर’ हा उपशीर्षक किताब तसेच ‘बेस्ट ड्रेस’ पुरस्कारही पटकावला. स्पर्धेपूर्वी दिवा पेजंट्सतर्फे चार दिवसांचा सखोल ग्रूमिंग प्रोग्राम आयोजित करण्यात आला होता. या प्रशिक्षणामध्ये त्वचारक्षण, सकारात्मक विचारसरणी, मानसिक विकास यासह प्रसिद्ध कोरिओग्राफर पूजा सिंग आणि इमेज कन्सल्टंट सिसिलिया सान्याल यांचे रॅम्प वॉक व व्यक्तिमत्त्व विकासाचे विशेष सत्र आयोजित करण्यात आले होते.

आरती बोरोले या २०२३ मध्ये अमेरिकेतून भारतात परतल्या असून, त्यांना आयटी क्षेत्रात १० वर्षांहून अधिक अनुभव आहे. सध्या त्या एपेक्सॉन या कंपनीत सिनियर सॉफ्टवेअर इंजिनियर म्हणून कार्यरत आहेत. त्या एक कर्तव्यदक्ष व्यावसायिक, पत्नी आणि दोन मुलांची आई आहेत. फिटनेस व नृत्य हे त्यांचे आवडते छंद असून त्या दररोज नियमितपणे व्यायाम करतात.

या खिताबापर्यंतचा प्रवास आरतींसाठी अत्यंत मेहनतीचा व शिस्तीचा ठरला. व्यावसायिक जबाबदाऱ्या, कुटुंबीयांचे दैनंदिन जीवन आणि कठोर पेजंट तयारी यांचा त्यांनी उत्तम समतोल साधला. अनेकदा रात्री उशिरापर्यंत त्या परिचय सत्रे, प्रतिभा फेऱ्या आणि विविध स्टेज सादरीकरणांची तयारी करत असत.

आपल्या यशाबद्दल कृतज्ञता व्यक्त करताना आरती बोरोले यांनी सांगितले की, अंजना मास्करेनहास आणि कार्ल मास्करेनहास हे संपूर्ण प्रवासात त्यांचे मोठे आधारस्तंभ ठरले. त्यांच्या मार्गदर्शनामुळेच स्वतःमधील आत्मविश्वास आणि व्यक्तिमत्त्व अधिक खुलले, असे त्यांनी नमूद केले.

आरती बोरोले या चिनावल विद्यालयातील सेवानिवृत्त शिक्षक जे. व्ही. बोरोले यांच्या सून असून, त्यांच्या या यशाबद्दल चिनावल व परिसरातून त्यांचे सर्वत्र अभिनंदन व कौतुक होत आहे.