जालना–मंठा महामार्गावर भीषण अपघात; शेतकऱ्याच्या मुलाचा जागीच मृत्यू

लेवाजगत न्युज जालना : जालना–मंठा या मुख्य महामार्गावर रविवारी सकाळी झालेल्या भीषण अपघातात कटाळा खुर्द (ता. मंठा) येथील 20 वर्षीय करण गणेश खंडागळे या तरुणाचा दुर्दैवी मृत्यू झाला. भरधाव कारने पाठीमागून दिलेल्या जबर धडकेत करणचा जागीच मृत्यू झाला असून परिसरात हळहळ व्यक्त केली जात आहे.

डबा आणण्यासाठी घराकडे जात असताना अपघात

मिळालेल्या माहितीनुसार, रविवारी सकाळी 11 वाजण्याच्या सुमारास करण खंडागळे शेतातील कामे आटोपून जेवणासाठी डबा आणण्यासाठी दुचाकीने घरी जात होता. यावेळी जालन्याकडून परभणीच्या दिशेने जाणारी कार क्रमांक MH 04 EF 6840 ही अत्यंत वेगात येत होती.

या कारचालकाने करण याच्या दुचाकीला पाठीमागून जबर धडक दिली. धडक दिल्यावरही कारचालकाने वाहन न थांबवता दुचाकीसह करणला तब्बल 200 ते 300 फूट फरफटत नेले.

धडपडत जीव वाचविण्याचा प्रयत्न; कारचालक फरार

धडक झाल्यानंतर करण दुचाकीत अडकलेला असताना जीव वाचविण्यासाठी धडपडत होता. मात्र कारचालकाने दया न दाखवता गाडीस्थळ सोडून पळ काढला.

आवाज ऐकून शेजारील शेतात काम करणारे शेतकरी घटनास्थळी धावत आले. नागरिकांनी तात्काळ करणला जालना जिल्हा रुग्णालयात दाखल केले. परंतु डोक्याला व हाताला गंभीर दुखापत झाल्याने अतिरक्तस्राव झाला आणि उपचारादरम्यान त्याचा मृत्यू झाला.

पोलिसांचा तपास सुरू

अपघाताची माहिती मिळताच पोलिसांनी घटनास्थळी धाव घेतली आणि दोन्ही वाहने ताब्यात घेतली.
अज्ञात कारचालकाविरोधात वाटूर फाटा पोलीस स्टेशनमध्ये गुन्हा दाखल करण्यात आला असून आरोपीचा शोध सुरू आहे.

करणच्या मृत्यूनंतर गावात व परिसरात शोककळा पसरली आहे. मेहनती शेतकऱ्याच्या मुलाचा निष्पाप बळी गेल्याने सर्वत्र हळहळ व्यक्त केली जात आहे.