यावल नगरपरिषद अध्यक्षपदावर महाविकास आघाडीचा झंझावाती विजय भाजपला मोठा धक्का; १४,१५३ मतांच्या फरकाने छाया अतुल पाटील विजयी

 

यावल नगरपरिषद अध्यक्षपदावर महाविकास आघाडीचा झंझावाती विजय

भाजपला मोठा धक्का; १४,१५३ मतांच्या फरकाने छाया अतुल पाटील विजयी

लेवाजगत न्यूज यावल :-यावल नगरपरिषदेच्या अध्यक्षपदाच्या थेट निवडणुकीत महाविकास आघाडी व शिवसेना गटाच्या उमेदवार छाया अतुल पाटील यांनी तब्बल १४,१५३ मतांच्या फरकाने दणदणीत विजय मिळवला. या झंझावाती निकालामुळे यावलच्या राजकारणात मोठी उलथापालथ झाली असून, शहराच्या राजकीय इतिहासात नवे पर्व सुरू झाल्याचे चित्र आहे.

नगरपरिषद निवडणुकीत भारतीय जनता पार्टी (भाजप) चे ८ नगरसेवक निवडून आले असले, तरी अध्यक्षपद भाजपच्या हातातून निसटल्याने पक्षाला मोठा राजकीय धक्का बसला आहे. हा पराभव केवळ एक पद गमावण्यापुरता मर्यादित नसून, भाजप आमदारांच्या कामगिरीबाबत यावलकरांनी मतदानातून व्यक्त केलेली स्पष्ट नाराजी असल्याची चर्चा राजकीय वर्तुळात रंगू लागली आहे.

🔢 नगरसेवक पदांचे पक्षनिहाय निकाल

भाजप – ८

भारतीय राष्ट्रीय काँग्रेस – ६

राष्ट्रवादी काँग्रेस – ३

अपक्ष – ४

शिवसेना (उद्धव बाळासाहेब ठाकरे गट) – २

संख्याबळ भाजपकडे असतानाही नगराध्यक्षा पदावर महाविकास आघाडीचा विजय हे भाजपसाठी मोठे राजकीय अपयश मानले जात आहे.

 पाटील कुटुंबाचा ऐतिहासिक क्षण

शिवसेना (उद्धव बाळासाहेब ठाकरे गट) चे नेते अतुल वसंतराव पाटील यांनी आपल्या पत्नी छाया अतुल पाटील यांना नगराध्यक्षा पदावर विजयी करून यावलच्या राजकीय इतिहासात नवा अध्याय लिहिला आहे. हा विजय म्हणजे संघटनशक्ती, स्थानिक जनतेचा विश्वास आणि महाविकास आघाडीच्या एकजुटीचा ठोस पुरावा असल्याची भावना समर्थकांकडून व्यक्त करण्यात येत आहे.