गोदावरी अभियांत्रिकी महाविद्यालयात राष्ट्रीय विज्ञान दिन उत्साहात साजरा

लेवाजगत न्युज जळगाव : Godavari Engineering College येथे राष्ट्रीय विज्ञान दिन मोठ्या उत्साहात साजरा करण्यात आला. दरवर्षी २८ फेब्रुवारी रोजी C. V. Raman यांनी शोधलेल्या ‘रमण परिणाम’च्या स्मरणार्थ हा दिवस साजरा केला जातो. वैज्ञानिक दृष्टिकोन वाढवणे आणि नवोपक्रमांना प्रोत्साहन देणे हा या दिवसाचा मुख्य उद्देश आहे. यावर्षाची संकल्पना – “महिलांचा विज्ञानातील सहभाग : विकसित भारतासाठी प्रेरक शक्ती” अशी होती.

कार्यक्रमाची सुरुवात माननीय प्राचार्य डॉ. विजयकुमार पाटील, सर्व विभागप्रमुख, प्राध्यापक व विद्यार्थ्यांच्या उपस्थितीत करण्यात आली. C. V. Raman यांच्या प्रतिमेस पुष्पहार अर्पण करून अभिवादन करण्यात आले.

या प्रसंगी विद्यार्थ्यांनी विज्ञानाचे महत्त्व स्पष्ट करणारी प्रभावी भाषणे सादर केली. मार्गेश वाघ, यश धनगर, भैरवी कुरकुरे, राजश्री यादव, रिद्धी भिरूड, गौरव इंगळे आणि माहिन शेख यांनी आपले विचार मांडत विज्ञान क्षेत्रातील संधी व जबाबदाऱ्या अधोरेखित केल्या.

प्राचार्य डॉ. विजयकुमार पाटील यांनी आपल्या मार्गदर्शनपर भाषणात विद्यार्थ्यांना नवोपक्रम व संशोधनाची दिशा स्वीकारण्याचे आवाहन केले. त्यांनी यावर्षीच्या विषयाचा संदर्भ देत महिलांच्या विज्ञानातील योगदानाचे महत्त्व विशद केले. कोविड काळात विकसित झालेल्या लसीकरण मोहिमेचा उल्लेख करत तो शतकातील महत्त्वाचा वैज्ञानिक टप्पा असल्याचे त्यांनी नमूद केले. तसेच भविष्यातील अन्नटंचाईसारख्या आव्हानांवर वैज्ञानिक दृष्टीकोनातून उपाय शोधण्याचे आवाहनही त्यांनी केले.

कार्यक्रमाचे सूत्रसंचालन प्रथम वर्ष AI&DS शाखेतील आदेश जैस्वाल यांनी केले, तर समन्वयक म्हणून ग्रंथपाल प्रा. नाकुल गाडगे यांनी काम पाहिले. सर्व विभागांतील प्राध्यापक व विद्यार्थ्यांच्या उपस्थितीत कार्यक्रम उत्साहपूर्ण वातावरणात पार पडला.

कार्यक्रमाच्या यशस्वी आयोजनाबद्दल Godavari Foundation चे अध्यक्ष डॉ. उल्हास पाटील, सचिव डॉ. वर्षा पाटील, सदस्य डॉ. केतकी पाटील, डॉ. वैभव पाटील (डीएम कार्डिओलॉजिस्ट) व डॉ. अनिकेत पाटील यांनी कौतुक व्यक्त केले.