गोदावरी अभियांत्रिकी महाविद्यालयात मराठी भाषा गौरव दिन उत्साहात साजरा

लेवाजगत न्युज जळगाव : Godavari Engineering College येथे मराठी भाषा गौरव दिन उत्साहपूर्ण वातावरणात साजरा करण्यात आला. महान कवी Kusumagraj यांच्या जयंतीनिमित्त दरवर्षी २७ फेब्रुवारी रोजी हा दिवस साजरा केला जातो. मराठी भाषेचा अभिमान जपणे आणि तिचा प्रचार-प्रसार करणे हा या दिवसाचा मुख्य उद्देश आहे.

कार्यक्रमाची सुरुवात प्राचार्य डॉ. विजयकुमार पाटील, सर्व विभागप्रमुख, प्राध्यापक व विद्यार्थ्यांच्या उपस्थितीत झाली. कुसुमाग्रज यांच्या प्रतिमेस पुष्पहार अर्पण करून अभिवादन करण्यात आले.

या प्रसंगी कृष्णा राठोड, तेजस्विनी उगळे, ऋषिकेश पाटील आणि देवेंद्र पाटील या विद्यार्थ्यांनी मराठी भाषेचे महत्त्व अधोरेखित करणारी भाषणे केली. मराठी भाषा गौरव दिनानिमित्त कवी Suresh Bhat लिखित “लाभले आम्हास भाग्य बोलतो मराठी” हे गीत विद्यार्थी ऋषिकेश पाटील यांनी सुरेल आवाजात सादर केले.

प्राचार्य डॉ. विजयकुमार पाटील यांनी आपल्या मार्गदर्शनपर भाषणात विद्यार्थ्यांना मराठी भाषेचा अधिकाधिक वापर करण्याचे आवाहन केले. विद्यार्थ्यांनी कविता, लेख, नाटके आणि गीते लिहून विविध साहित्यिक स्पर्धांमध्ये सहभागी व्हावे, असे त्यांनी सांगितले. मातृभाषेचा अभिमान बाळगून तिचे जतन करण्याचे आवाहन त्यांनी केले.

कार्यक्रमाचे सूत्रसंचालन प्रथम वर्ष AI&DS शाखेतील चेतन चौधरी यांनी केले. “ही मायभूमी, ही जन्मभूमी, ही कर्मभूमी अमुची” हे गीत त्यांनी सादर करून उपस्थितांची दाद मिळवली. कार्यक्रमाचे समन्वयक ग्रंथपाल प्रा. नाकुल गाडगे होते. मोठ्या संख्येने उपस्थित विद्यार्थी व प्राध्यापकांमुळे कार्यक्रम यशस्वीरीत्या पार पडला.

कार्यक्रमाच्या आयोजनाबद्दल Godavari Foundation चे अध्यक्ष डॉ. उल्हास पाटील, सचिव डॉ. वर्षा पाटील, सदस्य डॉ. केतकी पाटील, डॉ. वैभव पाटील आणि डॉ. अनिकेत पाटील यांनी कौतुक व्यक्त केले.