हरवलेल्या दोन चिमुकल्यांचा अखेर शोध; केंद्रीय मंत्री रक्षाताई खडसे यांच्या पुढाकारामुळे कुटुंबाला दिलासा

 

हरवलेल्या दोन चिमुकल्यांचा अखेर शोध; केंद्रीय मंत्री रक्षाताई खडसे यांच्या पुढाकारामुळे कुटुंबाला दिलासा

लेवाजगत न्यूज यावल (जि. जळगाव) : प्रतिनिधी
यावल तालुक्यातील गायरान येथील एका कुटुंबावर ओढवलेल्या अत्यंत दुर्दैवी घटनेत अखेर आशेचा किरण दिसून आला आहे. हरवलेल्या दोन लहान मुलांचा सुरक्षित शोध लागल्याने कुटुंबाला मोठा दिलासा मिळाला असून, या प्रकरणात केंद्रीय क्रीडा व युवक कल्याण राज्यमंत्री यांच्या तत्पर हस्तक्षेपामुळे शोधमोहीमेला गती मिळाल्याची माहिती समोर आली आहे.

मिळालेल्या माहितीनुसार, गायरान (ता. यावल) येथील रहिवासी बालकृष्ण गुलाब बारेला (वय बत्तीस वर्षे) हे दिनांक आठ सप्टेंबर दोन हजार पंचवीस रोजी रात्री सुमारे आठ वाजून तीस मिनिटांनी आपल्या दोन लहान मुलांसह घरातून बाहेर पडले होते. त्यांच्यासोबत त्यांची मुले रोहन (वय आठ वर्षे) आणि अंकित (वय पाच वर्षे) होती. त्यानंतर काही दिवस त्यांच्याबाबत कोणतीही माहिती मिळत नव्हती.

दरम्यान, बारा सप्टेंबर रोजी रात्री दहा वाजून बावीस मिनिटांनी बालकृष्ण बारेला यांनी एका अज्ञात दूरध्वनी क्रमांकावरून आपल्या भाऊ मगन बारेला यांना संपर्क साधून ते भरुच – दादर एक्सप्रेस या रेल्वेगाडीने प्रवास करत असल्याचे सांगितले. दादर स्थानकावर गाडी पोहोचल्यानंतर त्यांना जाग आली असता त्यांच्या दोन्ही मुलांचा डब्यात कुठेही पत्ता लागत नव्हता. अचानक दोन्ही लहान मुले दिसेनाशी झाल्याने त्यांनी दोन दिवस स्वतः त्यांचा शोध घेतला; मात्र त्यानंतर त्यांच्याशीही संपर्क पूर्णपणे तुटला.

घटनेची गंभीरता लक्षात घेऊन सोळा सप्टेंबर रोजी कुटुंबीयांनी मुंबई सेंट्रल रेल्वे पोलीस ठाण्यात हरवल्याची तक्रार नोंदवली. तपास सुरू असतानाच वीस सप्टेंबर रोजी वडाळा रेल्वे पोलिसांकडून एका जखमी व्यक्तीचा छायाचित्र कुटुंबीयांना पाठवण्यात आला. त्या छायाचित्रावरून जखमी व्यक्तीची ओळख बालकृष्ण बारेला अशी पटली.

माहितीनुसार, सतरा सप्टेंबर रोजी रेल्वेतून पडल्याने ते गंभीर जखमी झाले होते. त्यांना उपचारासाठी मुंबई येथील जे. जे. रुग्णालयात दाखल करण्यात आले होते. मात्र उपचार सुरू असतानाच वीस सप्टेंबर दोन हजार पंचवीस रोजी त्यांचे दुर्दैवी निधन झाले. या घटनेमुळे कुटुंबावर दुःखाचा डोंगर कोसळला होता. आई आधीच वारलेली असताना वडिलांचेही निधन झाले आणि दोन्ही लहान मुलांचा काहीच पत्ता लागत नसल्याने कुटुंबीय अत्यंत चिंतेत होते.

दरम्यान ही बाब स्थानिक कार्यकर्त्यांमार्फत केंद्रीय मंत्री रक्षाताई खडसे यांच्या निदर्शनास आणून देण्यात आली. त्यांनी या प्रकरणाची गांभीर्याने दखल घेत मुंबई सेंट्रल रेल्वे पोलिसांना तात्काळ सूचना दिल्या आणि हरवलेल्या मुलांचा शोध घेण्यासाठी व्यापक शोधमोहीम राबविण्याचे निर्देश दिले. त्यांच्या पाठपुराव्यानंतर रेल्वे पोलीस तसेच संबंधित यंत्रणांनी जळगाव, भरुच आणि दादर परिसरात कसून शोधमोहीम सुरू केली.

अखेर आठ ऑक्टोबर रोजी पहाटे सुमारे चार वाजता दोन्ही मुलांचा सुरक्षित शोध लागल्याची आनंदाची बातमी समोर आली. नवरात्रीच्या पवित्र दिवसांत मिळालेल्या या दिलासादायक बातमीमुळे कुटुंबीयांना मोठा आधार मिळाला.

यानंतर कुटुंबीयांनी केंद्रीय मंत्री रक्षाताई खडसे यांची प्रत्यक्ष भेट घेऊन त्यांचे मनःपूर्वक आभार मानले. यावेळी रक्षाताईंनी दोन्ही मुलांची प्रेमाने विचारपूस करत त्यांच्या पुढील शिक्षणासाठी आवश्यक ती सर्वतोपरी मदत करण्याचे आश्वासन दिले.

अनेक दिवसांच्या अनिश्चिततेनंतर मिळालेला हा दिलासादायक शेवट केवळ त्या कुटुंबासाठीच नव्हे, तर माणुसकीवरील विश्वास अधिक दृढ करणारा ठरला आहे. या संपूर्ण घटनेतून रक्षाताई खडसे यांची संवेदनशीलता, तत्परता आणि समाजाप्रती असलेली बांधिलकी पुन्हा एकदा अधोरेखित झाली आहे.