निपुण महाराष्ट्र उपक्रमांतर्गत मातांचा गौरव; तीन स्मार्ट टीव्हीसह डिजिटल वर्गाचे उद्घाटन
निपुण महाराष्ट्र उपक्रमांतर्गत मातांचा गौरव; तीन स्मार्ट टीव्हीसह डिजिटल वर्गाचे उद्घाटन
लेवाजगत न्यूज | भुसावळ : जिल्हा परिषद प्राथमिक शाळा काहुरखेडे येथे जागतिक महिला दिन उत्साहात साजरा करण्यात आला. यावेळी निपुण महाराष्ट्र अभियानांतर्गत मातांचा गौरव करत तीन स्मार्ट टीव्हींच्या माध्यमातून डिजिटल क्लासरूमचे उद्घाटन करण्यात आले.
निपुण महाराष्ट्र अभियानांतर्गत पायाभूत साक्षरता व संख्याज्ञानाची गुणवत्ता वाढविण्यासाठी विद्यार्थ्यांच्या शिक्षणात मातांचा सक्रिय सहभाग महत्त्वाचा ठरत असल्याने शाळेत मातांचा विशेष सन्मान करण्यात आला.
दरम्यान, ग्रामपंचायत काहुरखेडे यांच्या वतीने शाळेला तीन स्मार्ट टीव्ही भेट देण्यात आले. या स्मार्ट टीव्हींच्या साहाय्याने सुरू करण्यात आलेल्या डिजिटल क्लासरूमचे उद्घाटन शाळा व्यवस्थापन समितीचे अध्यक्ष ज्ञानेश्वर पाटील व सरपंच गीता पाटील यांच्या हस्ते करण्यात आले.
यावेळी शाळा व्यवस्थापन समिती सदस्य ज्योती सपकाळे, मनीषा पाटील, वैशाली पाटील, ललिता झांबरे तसेच सरपंच गीता पाटील या मातांचा शाल व पुष्पगुच्छ देऊन सन्मान करण्यात आला.
कार्यक्रमात विद्यार्थिनी गायत्री पाटील व श्रद्धा पाटील यांनी महिला दिनानिमित्त प्रभावी भाषणे केली. सावित्रीबाई फुले यांच्या प्रेरणेने आज महिला शिक्षण, विज्ञान, क्रीडा व राजकारण अशा विविध क्षेत्रांत उल्लेखनीय कामगिरी करत उंच भरारी घेत असल्याचे त्यांनी आपल्या भाषणातून सांगितले.
महिला दिनानिमित्त विद्यार्थिनी माता सावित्रीबाई, माता जिजाऊ, भारत माता व संत मुक्ताबाई यांच्या वेशभूषेत सहभागी झाल्या होत्या. विविध पोशाखांमुळे कार्यक्रमात रंगत वाढली. तसेच विद्यार्थिनींसाठी फॅन्सी ड्रेस स्पर्धेचे आयोजनही करण्यात आले.
कार्यक्रमाचे सूत्रसंचालन उपशिक्षक समाधान जाधव यांनी केले, तर आभार प्रदर्शन मुख्याध्यापिका उज्वला सुरवाडे यांनी केले. या उपक्रमामुळे महिलांचा सन्मान होत असल्याने उपस्थित महिलांनी आनंद व्यक्त केला असून ग्रामस्थ व विद्यार्थ्यांनी या स्तुत्य उपक्रमाचे कौतुक केले.
कोणत्याही टिप्पण्या नाहीत