खेलो इंडिया अस्मिता’ फुटबॉल स्पर्धेत डॉ. उल्हास पाटील स्कूलच्या मुलींची ऐतिहासिक कामगिरी; कास्यपदकावर कोरले नाव!

लेवाजगत न्युज भुसावळ | प्रतिनिधी

जळगाव जिल्हा फुटबॉल असोसिएशनतर्फे आयोजित ‘खेलो इंडिया अस्मिता’ फुटबॉल स्पर्धा २०२६ मध्ये भुसावळ येथील डॉ. उल्हास पाटील इंग्लिश मीडियम स्कूलच्या अंडर-१६ मुलींच्या संघाने चमकदार कामगिरी केली आहे. या संघाने स्पर्धेत तृतीय क्रमांक पटकावत कास्यपदक (Bronze Medal) आपल्या नावावर केले.

स्पर्धेचा थरार आणि विजय

ही स्पर्धा जळगाव येथील गोदावरी अभियांत्रिकी महाविद्यालयाच्या मैदानावर पार पडली. संपूर्ण जिल्हाभरातून विविध नामवंत संघ या स्पर्धेत सहभागी झाले होते. मात्र, भुसावळच्या या विद्यार्थिनींनी आपल्या आक्रमक खेळाच्या जोरावर प्रतिस्पर्ध्यांना नमवून आपली वेगळी छाप पाडली. संघातील खेळाडूंची जिद्द, एकजूट आणि उत्कृष्ट समन्वय या विजयाचे मुख्य सूत्र ठरले.

मान्यवरांकडून कौतुकाचा वर्षाव

विद्यार्थिनींच्या या दैदीप्यमान यशाबद्दल सर्व स्तरांतून त्यांचे कौतुक होत आहे. संस्थेचे अध्यक्ष डॉ. उल्हास पाटील, डॉ. वर्षा पाटील, डॉ. केतकी पाटील, डॉ. वैभव पाटील आणि शाळेच्या मुख्याध्यापिका सौ. अनघा पाटील यांनी विजेत्या संघाचे अभिनंदन केले. तसेच, या खेळाडूंनी भविष्यातही अशाच प्रकारे जिल्ह्याचे नाव उंचावावे, अशा शुभेच्छा त्यांना देण्यात आल्या.