ठाणे रेल्वे स्थानकाजवळ ‘शिवशाही’ बसला भीषण आग; सुदैवाने जीवितहानी टळली
ठाणे रेल्वे स्थानकाजवळ ‘शिवशाही’ बसला भीषण आग; सुदैवाने जीवितहानी टळली
परिसरात गुरुवारी एक धक्कादायक घटना घडली. सेटीस ब्रिजवर उभी असलेली ‘शिवशाही’ बस अचानक पेट घेतल्याने प्रवाशांमध्ये एकच खळबळ उडाली. काही क्षणांतच बसमधून धुराचे मोठे लोट बाहेर पडू लागले आणि आगीने भीषण रूप धारण केले. या घटनेमुळे स्टेशन परिसरात मोठा गोंधळ निर्माण झाला असून नागरिकांमध्ये भीतीचे वातावरण पसरले.
मिळालेल्या माहितीनुसार, संबंधित बस ठाणे येथून पालघरमार्गे बोईसरकडे जात होती. मात्र स्टेशनजवळ आल्यानंतर बस अचानक बंद पडली. चालकाने बस तपासण्याचा प्रयत्न करत असतानाच बसच्या खालच्या भागातून धूर निघू लागला आणि काही क्षणांतच आगीने विक्राळ रूप धारण केले. इंजिन आणि डिझेल टाकीजवळून आग लागल्याने ती झपाट्याने संपूर्ण बसमध्ये पसरली.
घटनेच्या वेळी बसमध्ये सुमारे १५ प्रवासी होते. आग लागल्याचे लक्षात येताच सर्व प्रवाशांनी तत्काळ बसमधून बाहेर धाव घेतली. त्यांच्या प्रसंगावधानामुळे मोठी दुर्घटना टळली. सुदैवाने या घटनेत कोणतीही जीवितहानी झाली नाही. मात्र काही क्षणांतच बस पूर्णपणे जळून खाक झाल्याने प्रवाशांचे सामानही आगीत नष्ट झाले.
आग लागल्याची माहिती मिळताच अग्निशमन दलाच्या गाड्या तातडीने घटनास्थळी दाखल झाल्या. जवानांनी पाण्याचा मारा करत आग आटोक्यात आणली. स्थानिक नागरिकांनीही मदतीसाठी धाव घेतली. मात्र आगीची तीव्रता इतकी प्रचंड होती की, बस काही मिनिटांतच पूर्ण जळून गेली आणि केवळ सांगाडा उरल्याचे दृश्य पाहायला मिळाले.
या घटनेमागील नेमके कारण अद्याप स्पष्ट झालेले नाही. प्राथमिक अंदाजानुसार शॉर्ट सर्किट किंवा इंजिन गरम झाल्यामुळे आग लागली असावी, अशी शक्यता व्यक्त केली जात आहे. सध्या वाढत्या उष्णतेमुळे वाहनांमध्ये बिघाड होण्याच्या घटना वाढत असून, या घटनेचा संबंधही तापमानाशी असू शकतो, असे सांगितले जात आहे.
कोणत्याही टिप्पण्या नाहीत