महापौरांच्या निर्देशानंतर जळगावात मान्सूनपूर्व रस्ता डागडुजीला वेग महापौर दीपमाला काळे यांनी केली कामांची प्रत्यक्ष पाहणी

 

महापौरांच्या निर्देशानंतर जळगावात मान्सूनपूर्व रस्ता डागडुजीला वेग

महापौर दीपमाला काळे यांनी केली कामांची प्रत्यक्ष पाहणी

जळगाव (लेवाजगत न्यूज प्रतिनिधी):
पावसाळा अवघ्या काही दिवसांवर येऊन ठेपल्याने जळगाव शहरातील रस्त्यांच्या दुरवस्थेबाबत महापालिका प्रशासन आता अॅक्शन मोडमध्ये आले आहे. शहरातील नागरिकांना पावसाळ्यात खड्ड्यांमुळे त्रास सहन करावा लागू नये, यासाठी महापौर यांनी “मान्सूनपूर्व सर्व प्रमुख रस्त्यांची तात्काळ डागडुजी व खड्डे बुजविण्याची कामे पूर्ण करा,” असे कडक निर्देश प्रशासनाला दिले होते.

महापौरांच्या आदेशानंतर महापालिका बांधकाम विभागाने तातडीने काम सुरू केले असून, मंगळवार (दि. २६ मे) रोजी सकाळपासून शहरात विविध ठिकाणी रस्ता दुरुस्ती मोहिमेला सुरुवात करण्यात आली.

स्टेडियम कॉम्प्लेक्स परिसरातील कामाची पाहणी

आज सकाळी महापौर यांनी शहरातील स्टेडियम कॉम्प्लेक्स परिसरात सुरू असलेल्या डागडुजीच्या कामाची प्रत्यक्ष पाहणी केली. यावेळी संबंधित अधिकाऱ्यांना कामाचा दर्जा राखण्याच्या तसेच वेळेत काम पूर्ण करण्याच्या सूचना त्यांनी दिल्या.

पावसाळ्यापूर्वी रस्ते खड्डेमुक्त करण्यावर भर

दरवर्षी पावसाळ्यात शहरातील रस्त्यांवर मोठ्या प्रमाणावर खड्डे पडत असल्याने वाहनधारक आणि नागरिकांना मोठा त्रास सहन करावा लागतो. अनेक ठिकाणी अपघातांचाही धोका निर्माण होतो. ही बाब लक्षात घेऊन महापौरांनी मान्सूनपूर्व नियोजनाचा विशेष आढावा घेतला असून, मुख्य चौक, प्रमुख रस्ते आणि अंतर्गत भागातील रस्ते वाहतुकीसाठी सुरक्षित करण्यावर भर दिला जात आहे.

रहदारीच्या प्रमुख रस्त्यांना प्राधान्य

महापालिकेच्या बांधकाम विभागाने शहरातील खराब रस्त्यांचे सर्वेक्षण पूर्ण केले असून, सर्वाधिक रहदारी असलेल्या आणि अत्यंत खराब झालेल्या रस्त्यांच्या डागडुजीला प्राधान्य देण्यात येत आहे. पावसाळा तोंडावर असल्याने मर्यादित वेळेत महत्त्वाचे रस्ते खड्डेमुक्त करण्याचे मोठे आव्हान प्रशासनासमोर उभे आहे.