विदर्भ एक्स्प्रेस २३ मेपर्यंत नागपूर(अजनी)पर्यंतच; गोंदिया मार्गावरील प्रवाशांची गैरसोय वाढणार

 

विदर्भ एक्स्प्रेस २३ मेपर्यंत नागपूर(अजनी)पर्यंतच; गोंदिया मार्गावरील प्रवाशांची गैरसोय वाढणार

लेवाजगत न्यूज नागपूर : दक्षिण पूर्व मध्य रेल्वे अंतर्गत गोंदिया रेल्वे स्थानकावर रेल्वे ट्रॅक नूतनीकरण, इंटरलॉकिंग, प्लॅटफॉर्म विस्तार आणि नवीन मार्ग जोडणीची महत्त्वाची कामे हाती घेण्यात आली आहेत. या पार्श्वभूमीवर रेल्वे प्रशासनाने विदर्भ एक्स्प्रेसच्या मार्गात तात्पुरता बदल करण्याचा निर्णय घेतला आहे.

मुंबईच्या छत्रपती शिवाजी महाराज टर्मिनस (सीएसएमटी) ते गोंदिया दरम्यान धावणारी विदर्भ एक्स्प्रेस (क्र. १२१०५/१२१०६) आता ३ मे ते २३ मेदरम्यान गोंदियाऐवजी नागपूर/अजनीपर्यंतच धावणार आहे. त्यामुळे गोंदिया, भंडारा आणि तुमसर परिसरातील प्रवाशांना मोठ्या गैरसोयीचा सामना करावा लागणार आहे.

कसे असेल बदललेले वेळापत्रक?

• गाडी क्रमांक १२१०५ विदर्भ एक्स्प्रेस सीएसएमटीहून सुटल्यानंतर नागपूर/अजनी येथेच अंतिम थांबा घेईल.
• परतीच्या प्रवासात १२१०६ विदर्भ एक्स्प्रेस गोंदियाऐवजी नागपूर/अजनी येथूनच मुंबईकडे रवाना होईल.

रेल्वे प्रशासनाने सांगितले की, गोंदिया स्थानकावरील विकासकामांमुळे हा निर्णय आवश्यक ठरला आहे. याचबरोबर या मार्गावरील काही अन्य रेल्वेगाड्यांच्या फेऱ्या व मार्गातही बदल करण्यात आले आहेत.

प्रवाशांना नियोजनाचे आवाहन

रेल्वे प्रशासनाने प्रवाशांना प्रवासापूर्वी रेल्वेचे अधिकृत ॲप किंवा वेबसाइट तपासूनच नियोजन करण्याचे आवाहन केले आहे. कामे पूर्ण झाल्यानंतर विदर्भ एक्स्प्रेस पुन्हा पूर्ववत गोंदियापर्यंत धावणार असल्याची माहिती प्रशासनाने दिली.

नागपूर-गोंदिया मार्ग हा प्रवासी, व्यापारी, शेतकरी तसेच मालवाहतुकीसाठी अत्यंत महत्त्वाचा मानला जातो. त्यामुळे या बदलाचा परिणाम हजारो प्रवाशांवर होणार असून काही दिवस पर्यायी व्यवस्थेचा आधार घ्यावा लागणार आहे.